Assigiimmik akeqartitsineq allanngortilerpaat

Imermut nukissiutinullu akeqartitseriaatsip allannguutissaattut siunnersuut Naalakkersuisut tamanut agguaappaat. Siunnersuut malilugu illoqarfiit mikinerusut nunaqarfiillu assigiimmik akeqartitsiviussapput, illoqarfiit anginerit akiviusut tunngavigalugit akilersuissapput taamaattoq akit appasinnerpaaffeqassallutik.

Siunnersuut saqqummiunneqartussanngorpoq ullumikkut imermut nukissiuteqarnermullu akeqartitseriaaseq inuiaqatigiinnut pitsaanngitsumik kinguneqartarmat. Ullumikkut periuseq landskarsimut akisuallaartoq, attaveqarnermut Naalakkersuisoq Jens B. Frederiksen saqqummiussassamini allappoq.

Landskarsi ullumikkut Nukissiorfiit ingerlanneqarnerannut 66 millioner koruuninik tapiissuteqartarpoq, taakkulu aningaasat ilinniartitaanerup sulisinnaasullu piginnaasaasa qaffassarnerannut atorniarneqarput.

Naalakkersuisut siunnersuutaat malillugu assersuutigalugu Sisimiormiut Nuummiukkut imermut innaallagissamullu akiliutaat appassaaq. Ullumikkut naatsorsueriaaseq atorneqartoq malillugu illoqarfiit taakku marluk erngup nukissiutillu tunisassiarineqarneranut naapertuuttumik akiliineq ajorput.

- Pingaartumik kiassarnermik innaallagissamillu Nuummi Sisimiunilu atuisut akiliivallaartarput - imaappoq imermik kiassarnermillu pilersuinermut aningaasartuutigineqartartut sinnerlugit akiliisarput, Jens B. Frederiksen allappoq.

Siunnersuummi pingaarnertut allannguutissaq tassaavoq illoqarfiit 1.500-nit inoqarnerit akiviusunik akiliisalissammata. Taamaattoq akit minnerpaaffilerneqassapput illoqarfiit nunaqarfiillu nukissiutinik pilersorneqarnerat tapeeqataaffigineqassammat.

Illoqarfiit nunaqarfiillu 1.500-nit inukinnerit assigiimmik akeqartitsiffiussapput siunissamilu akiusut ullumikkut akiusut tunngavigalugit annertussusilerneqassapput.

Naalakkersuisut aamma siunnersuutigaat ungasianiit kiassarnermik pilersuinermut akigitinneqartut appartinneqassasut. Tamanna tikinniarneqarpoq erngup nukinganik nukissiorfiit mingutsitsiffiunngitsut nukik pilersitaat atorluarniarlugu. CO2-mik nunatsinni aniatitsineq taamaasilluni annikillisinniarneqarpoq ilaatigut kissarsuutit uuliartortut pilersitaannik mingutsitsiffiusarmat.

Ullumilu ualigaa Naalakkersuisut nalunaarput siunnersuut ukiamut inatsisartut katersornissaanni aatsaat saqqummiunneqassasoq.

- Nukissiuutinut akit aaqqissuuteqqinneqarnissaannut amerlasuut isumaqatigiinnissaannik angusaqarnissarput pingaaruteqarpoq, aaqqissuusseqqinnissaq inuiaqatigiinnut annertuumik isumaqartussaammat. Tamanna pissutigalugu suliffeqarnermi suleqataasut oqaloqatiginissaannut, aammalu tunngavissamik ataatsimoortumik nassaarnissatsinnut piffissaqarnerunissarput kissaatigaarput, Jens B. Frederiksen kinguartitsineq pillugu nalunaarummini allappoq.