Assammik arsarluni nunatsinni pissartanngorniunnerit aallartilersut
Grønlandsbankenip 2018-2019-imi pissartanngorniunnernut aningaasaliisunngorneratigut pissartanngorniunnerit pisortatigoortumik taaguuserneqarput "Grønlandsbanken GM 2018".
Pissartanngorniunnerit Nuummi Inussivimmi ingerlanneqassapput aallarniutaasumillu unamminerit KNR2-kkut isiginnaarneqarsinnaassallutik. Unammineq siulleq nalunaaqutaq 12:30 pissaaq, arnani N-48 aamma Norsaq HC unammissallutik.
Tamanna pereerpat angutini SAK aamma N-48 unammissapput.
Nunatsinni pissartanngorniunnernut pilersaarutit assammik arsartartut kattuffiata nittartagaani ghf.gl-imi takuneqarsinnaapput.
Assammik arsarnermi nunatsinni pissartanngorniunneq, GrønlandsBANKEN GM 2018, PANAM2018-imut, aamma Inussivimmi juunip qaammataani ingerlanneqartussamut, piareersaataasussat pilersaarusiugaavoq.