Assammik arsaannermi unammineq naligiiffiginissaa naatsorsuutigineqartoq
Unammisussallu qilanaarput:
- Pissanganaq. Sungiusarnikuugatta, sungiusarluarnikuugatta, soorunami juullikkunni pauseqalaarluta. Kisianni timigissartarfimmi sungiusaqattaarnikuugatta, sungiusarnerput ingerlatiinnarlugu qilanaaqaagut unaminissamut, assammik arsarluni nunanut allanut unammisartoq, GSS-imeersoq, Inuk Olsen taama oqarpoq.
Nunatsinni angutit assammik arsartartut Savalimmiunut unammiartornerat VM-imut anngunniunnissamut piukkunnarsaatitut ilaatigut sungiusaataasoq, angutit nunanut allanut unammisartuisa aqutsisuata, Poul Petersenip oqaatigaa.
AAMMA ATUARUK Assammik arsarlutik nunanut allanut unammisartut Savalimmiormiunut unammilersut
- Marloriarlutik unammisussaaput, arfininngorpat sapaatiuppallu. Taavalu tullissaani VM-imut anngunniuttoqarnissaanut piareersaatitut ingerlapput.
Unamminissarlu naligiiffioratarsinnaasoq, Poul Petersen oqarpoq.
- Naligiittorujussuussapput pinngitsooratik. Savalimmiormiut hjemmebaneramik qujanartumik, taanna atorluarniartorujussuussavaat. Kisianni uagutsinnut periarfissatsialaavoq inuusuttut nutaat takussallutigit qanoq pikkoritsiginersut, Poul Petersen taama oqarpoq.
AAMMA ATUARUK Færøsk idrætshal for lille til landskamp i håndbold
Nunatsinniillu unammiartortut ajugaanissartik angorusuppaat
- Naatsorsuutigaara naligiillualaarumaarluta. Kisianni soorunami ajugaanissarput unammissutigissavarput, assammik arsarluni nunanut allanut unammisartoq GSS-imeersoq, Inuk Olsen Marie Kuitse Kristensenimut taama oqarpoq.
Angutit assammik arsarlutik Savalimiuni unamminerat Muusaarannguaq Ostermann-Søholm Andreas Poulsenilu aallakaatitsivimmiittoralugit KNR 1-ikkut toqqaannartumik arfininngornermi 16:50 aallakaatinneqassaaq.