Asii Tasiilami innuttaasunik ataatsimiititsisoq
![](/sites/default/files/styles/image_934x467/public/article_images/tasiilaq_-_borgermoede.jpg?itok=rVWBWxKQ)
Innuttaasut 110-t missaanniittut ataatsimiinnermi peqataapput, oqaaseqarumasorpassuaqarporlu, Kommuneqarfik Sermersooq tusagassiorfinnut nalunaaruteqarluni taama allappoq.
- Tasiilami pissutsinik aaqqiiniarluta uummatitsinnit iluunngarluta iliuuseqartaqaagut aningaasartuuteqarfigingaatsiartakkatsinnik. Naak suliat uungarpareeraluartut, angusassarput suli angunngikkipput ersarippoq. Taamaattumik Tasiilami meeqqat inuunerissut qanoq ililluta sinaakkusiussanerlugit innuttaasut siunnersuuteqarnissaat kissaatigaarput, Asii Chemnitz Narup taama oqarpoq nangillunilu:
- Ataatsimiinneq qiimmaallannartupilussuuvoq. Tasiilami allannguinissamut piumassuseqartoqarluarpoq. Ataatsimeeqataasut isumaqatigiissutigaat, ajornartorsiutit aaqqinneqarsinnaasut, illoqarfiit tamarmik akisussaaffimmik tigusippata, oqaaqqissaarutigalugulu, isummat aninneqartut eqqunngitsuusut, Asii Chemnitz Narup oqarpoq.
Tasiilami suliassakippallaartoq
Ataatsimeeqataasut oqaatigaat Tasiilami suliassakippallaarneq ajornartorsiutaasoq. Illoqarfimmi suliffissanik ilinniarfeqarfissanillu amerlanerusunik peqalernissaa, sunngiffimmilu periarfissaqarnerulernissaa kissaatigaat.
Ataatsimeeqataasut arlaqartut uparuarpaat, pingaartumik suliffissaaleqineq inuttut ajornartorsiuteqalersitsisartoq, soorlu imerajuttuunermik, aningaasanoorajuttuunermik meeqqanillu sumiginnaanermik kinguneqartitsisartumik.
- Isumaqataalluinnarpunga. Tasiilami amerlanerusunik suliffissaqalertariaqarpoq, ikinnerpaamillu ilinniaqqiffissaq ataaseq tamaaniittariaqarpoq. Kommunip tungaaniit suliffeqarfiit illoqarfimmi pilersitserusuttut sapinngisarput tamaat tikillugu ikiorusuppavut, borgmesteri oqarpoq.
Ataatsimeeqataasut ilarpassuisa aamma Tasiilami sunngiffimmi periarfissaqarpiannginnera uparuartorpaat. Ilaatigut ivigaaraasanik qallikkamik arsaattarfeqarnissaa, inuusuttunut kulturikkut illoqarnissaa, illoqarfimmi radioqarnissaa timersortarfiullu ammasarfiisa sivitsorneqarnissaat kissaatigaat.
Innuttaasunit immersorneqarluartoq
- Tasiilami sunngiffimmi periarfissanik amerlanerusunik peqarnissaa qularutissaanngilaq, kissaatigineqartutullu tusaasinnaasakka naapertuupput, taamaattumik amerlanerit piffissap sivikitsup iluani naammassineqarsinnaanissaat qularutiginngilara, Asii Chemnitz Narup oqarpoq.
Borgmesterip aamma Tasiilamiinnermini suleqatigiikkuutaat assigiinngitsut illoqarfimmi ajornartorsiutit pillugit qanimut suliarinnittut arlaqartut ataatsimeeqatigai. Taakku ilagaat inuussutissarsiuteqartut, najukkami ataatsimiititaliaq kommunimilu isumaginnittoqarfimmi sulisut.
- Tasiilami takussaasumik isumassarsianik pitsanngorsaataasinnaasunik pitsaasorpassuarnik pissarsivunga, Sermersuumi borgmesteri oqarpoq.
Borgmesterip nunaqarfiit Sermiligaaq aamma Isertoq sapaatit-akunnerata siuliani aamma tikeraarpai.