Asii: Siuariartortitsinermut aningaasaliisoqarli
Borgmesterimmi Hermann Berthelsenip Ole Dorphillu - Siumumeersut -Nunatta aningaaqarniarnikkut ajornartorsiutaata aaqqiissuteqarfiginissaanut sanaartornermut aningaasaliisoqartariaqarneranik tikkuartuipput.
Tamannalu Kommuneqarfik Sermersuumi borgmesterip Inuit Ataqatigiinneersup Asii Chemnitz Narupip isumaqatigaa.
- Isumaqataalluinnarpunga. Siuariartortitsinissamut periarfissaqarfiusunut aningaasaliisoqassaaq, immikkoortunilu pissarsiviusussaasutut isikkoqanngitsunut aningaasaliinerit annikillisarneqassallutik, Asii Chemnitz Narup tusagassiorfinnut nalunaaruteqarluni taama allappoq.
Apeqqutaassaarli Hermann Berthelsenip Ole Dorphillu Asii Chemnitz Narup isumaqatigissaneraat.
Taassumami erseqqissaatigaa Nunatsinni illoqarfiit marluinnaat innuttaasui ullumikkut amerliartortut, tassalu Tasiilap Nuullu.
- Taamaammat taakkunani attaveqaatinik inissianillu pitsanngorsaanerit siuarsaaviusariaqarput, Asii Chemnitz Narup oqarpoq.
Qeqqatali Qaasuitsullu kommuniini borgmestereqatai isumaqarput aningaasaliinerit kommuniminni pisariaqartut.
- Politikkimi sumiiffinnilu politikkimi soqutigisat pinnagit periusissiaq malillugu ineriartortitsineq aningaasaliineruvoq pingaarnerpaaq, Kommuneqarfik Sermersuumi borgmesteri taama oqarpoq.