Asii Chemnitz Narupip tunuarnera pillugu: Múte B. Egede ugguartoq
Asii Chemnitz Narup (IA) aningaasaqarnermut nunamullu namminermut naalakkersuisutut tunuarniarluni marlunngornermi ullaakkut tusagassiuutinut nalunaaruteqarpoq.
AAMMA ATUARUK Asii Chemnitz Narup trækker sig som naalakkersuisoq for finanser
Taamatullu aalajangernera Muté Bourup Egedemit uggorineqarpoq.
- Asii Chemnitz Narup pikkorissutut, anguniagaqallaqqissutut kiisalu takorluuillaqqissutut ilisimavarput taamaattumik soorunalimi uggornarpoq Naalakkersuisutut tunuarniuteqarmat, aalajangernerali ataqqivara.
Siusinnerusukkut pisut peqqutaallutik tunuartoq
Aningaasaqarnermut naalakkersuisuusimasoq KNR-imit apersorneqarusunngilaq, tusagassiuutinut nalunaarumminulli innersuussivoq. Tassalu Kommuneqarfik Sermersuumi ingerlatsinermut Kommunit Nakkutilliisoqarfiat sakkortuumik isornartorsiuereerneqarnerminut tunuarnera tunngaveqartoq.
- Suliaq ukiut arlallit matuma siornatigut, siusinnerusukkullu atorfigisimasama nalaani pisimasoq, naalakkersuisooqatigiit ingerlaannarnissaannut akornutaalersissinnaanngilara,
Kommuneqarfik Sermersuumi inissianik attartortitsinermut suliaq tunngasoq aallartinneqarnerata nalaani, Asii Chemnitz Narup borgmesteriuvoq.
AAMMA ATUARUK Kommuneqarfik Sermersooq nakkutilliisoqarfimmit isornartorsiungaatsiarneqarpoq
Nuummi inissaaleqineq aaqqiiviginiarlugu Kommuneqarfik Sermersuup amigartoorluni attartortitsinerata saniatigut, taamatut iliuuseqarneq aamma maleruagassanut unioqqutitsineruvoq. Tamannalu kommunini nakkutilliisoqarfimmiit borgmesterimut isornartorsiuingaatsiarpoq.
Asii Chemnitz Narup immaqaluunniit Charlotte Ludvigsen sorleq isornartorsiorneqarnersoq uani erseqinngilaq.
Kisianni Asii Chemnitz Narup tassa tunuarniuteqarpoq.
AAMMA ATUARUK Kommuneqarfik Sermersuumi borgmesteriusimasup ineqarnermut suliaq pillugu isornartorsiuineq ilungersunartumik tigugaa
Taannalu Kommunit nakkutilliisoqarfiata borgmesteriusimanerata nalaani pisut isornartorsiormagit tunuarluni allappoq.
- Nakkutilliisoqarfiup nalunaarusiaa uannik tatiginninnermik annertuumik aalassatitsisimarpasippoq. Periarfissamillu allamik takusaqarsinnaanngilanga taamaallaat tunuartariaqarninnit, Asii Chemnitz Narup allappoq.
Maanna Ineqarnermut, Attaveqaasersuutinut, Aatsitassanut, Inatsisit Atuutsitsinneqarnerannut Naligiissitaanermullu Naalakkersuisup, Naaja Nathanielsenip aningaasaqarnermut naalakkersuisuuffik akisussaaffigilerpaa.
Nunamullu namminermut naalakkersuisuuffik Mimi Karlsenimit akisussaaffigineqalerpoq.