Arsaattartunit pikkorissunit kajumissaarut: Arnat arsaattarnerat ima malunnarsiseqqinneqarsinnaavoq

Nunatsinni arnat arsaattarnerat siuarsarneqassappat Kalaallit Arsaattartut Kattuffiata arnanik angutinillu assigiinngisitsinini unitsittariaqarpaa. Arnat arsannermik piginnaaneqarluartut arlallit KNRip oqaloqatigisimasai taama isumaqarput.
Arnat isikkamik arsaallutni pissartanngorniunneranni Nuummi sapaatip akunnerata siuliani iligiit qulingiluaasunit sisamaannaat takkupput. Taamaakkaluartoq arnat siunissami takutitsilluarumapput. Assi © : Malik Brøns, KNR
aggustip 08-at 2019 05:50

Arnat nunatsinni pissartanngorniunnerannut sapaatip akunnerani kingullermi Nuummi ingerlanneqartumi peqataasussanit peqatigiiffinnit qulingiluanit sisamaannaat takkupput.  

Avannaaniit iligiit sisamat Nuummiillu ataaseq ilaassanatik nalunaarput, unammisaqattaarnerit ingerlassinnaajumallugit immikkut ittumik Nuummeersoq B-67 akuleriinnik inuttalersorneqarpoq.  

Sooruna kalaallit arnartaasa arsaattarnerat taama nakkangatigisoq?

Asii Kleist Berthelsen GSS

Assi © : Jens M. Madsen

15-inik ukiulik Asii Kleist Berthelsen pissartanngorniunnermi peqataavoq ukiumilu akiuulluarnerpaatut toqqagaalluni.

Arnat arsaattartut unammeqattaarneranni takkutinngitsoortut arlaqartut arsarnermilu  aallussinerat killeqartoq maluginiarneqarpoq, illit tamanna qanoq isumaqarfigaajuk?

-  Paasinarpoq arnat imatut pimoorusserujussuanngitsut, pissutigalugu arnat anguniagassaqannginnamik tassami arnani landsholdeqanngilaq, soqanngilaq. Taavalu klubimiit kattuffimmiillu malunnartumik angutit pineqarnerujussuusut taamaammat arnaalluni pimoorussinnginneq malunnarnerujussuuvoq angutinut sanilliullugu. Nangipporlu:

- Siullermik naligiinnerusumik pineqartariaqarput, arnalluunniit sungiusaasoqarneq ajoramik, GSS-imi arsaattartoq, Asii Kleist Berthelsen oqarpoq.

 Lisa Lind NÛK                                                                                                                                                            

Assi © : Privat

Arnat arsaattartut unammeqattaarneranni takkutinngitsoortut arlaqartut arsarnermilu  aallussinerat killeqartoq maluginiarneqarpoq, illit tamanna qanoq isumaqarfigaajuk?

- Angutit ukiorpassuarnik GM-ertoqartillugu eqqumaffigineqarnerusaramik, tusagassiutitigut saqqummiunneqallattaallutik KNR-ikkut toqqaannartumik aallakaatinneqartarlutik, arnat taamaanneqarneq ajoramik. Lisa Lind oqarpoq. Taanna Kalaallit Arsaattartut Kattuffiata (KAK) pilersigaanik arnanut arsaannermik ineriartortitsinissamut ataatsimiititaliamik pilersitsisoqarnikuuvoq, tassanilu Lisa Lind siulittaasuuvoq. Ataatsimiititaliaq pilersinneqarmalli 2018-imi arnat arsaattartut KAK-mut allagaqarlutillu saaffiginnissuteqartaraluarlutik suli ullumikkut iliuuseqartoqarsimanngitsoq, NUK-mi arsaattartoq Lisa Lind Oqarpoq.

- KAK arlaleriarluta attavigigaluarparput, naligiimmik pineqarnissarput suaartaatigalugu. Futsalimi aamma landsholdeqalerusulluta kisianni aningaasaqarniarneq aporfiujuaannarami.

Karoline Dahl NÛK

Assi © : Privat

Arnat arsaattartut unammeqattaarneranni takkutinngitsoortut arlaqartut arsarnermilu  aallussinerat killeqartoq maluginiarneqarpoq, illit tamanna qanoq isumaqarfigaajuk?

- Malunnartorujussuuvoq arsartartuulluni arnaalluni, angutit qanoq aallunneqartiginerat. Soorlu unamminerit tamarmik aallakaatinneqartarlutik, taavalu soorlu unammisaareersimagaanni pissartanngorniunnermi kingorna nunanut allanut unammisartussatut piukkussanik ingerlanneqartarlutik, taava illuatungaani arnat taakku tungaatigut unittooqqallutik naak aallussisunik arlaqartunik peqaraluartoq, GSS-imi arsaattartoq Karoline Dahl oqarpoq.

Taannali isumaqarpoq arsaattartut peqatigiiffiup iliuuseqarnissaannik aamma utaqqiinnartoqassanngitsoq. Arnammi arsaattartut namminneerlutik takutitsilluarunik kinguneqarluarsinnaassasoraa.

- Isumaqarpunga aamma sinerissami arnat arsarnermik soqutigisallit kajummissuseqarnerulissappata aamma soorlu maligassiuisunik imaluunniit qummut isigisinnaasaminnik amigaateqarmata aallakaatitsinerusoqarsinnaasoq.

Nivi Fleischer Berthelsen GSS

Assi © : Privat

Nivi Fleischer Berthelsen GSS-imi assammik arsartartuuvoq, ukiunilu pingasuni kingullerni nunatsinni arsaannermik pissartanngorniuttoqartillugu peqataasarpoq. Nunatsinni arnat arsaattartut ikiliartuinnarnera taassuma maluginiagaraa taamaammat arsaannermi unammeqataasalerniarluni aalajangerpoq.

Taassummattaaq immikkut maluginiagaraa upernaakkut meeqqat arsaannermik sungiusartartut amerlanersaat nukappiaraasarnerat. Ilaatigullu tamakku peqqutaallutik arnanik pikkorissunik qummut isigisassanik sinerissami amigaateqartoqartoq Nivi Fleischer Berthelsen isumaqarpoq.

- Niviarsiaqqat assut ikittarput, naluara sooq, immaqa kajumissaarineq apeqqutaasimassaaq. Tamakku aamma arnat ikiligaluttuinnarnerannik peqquteqarsinnaapput, isigisagummi malillugit nuarnaartorisagullu aamma malittaratsigit.

Arnat angutillu assigiinngitsumik pineqartutut misigisimallutik isornartorsiuinerat kattuffiup siulittaasuanit paasilluarneqarsinnaapput. 

Arnat angutillu arsaattartui asigiinngitsumik pineqartutut misiginarsinnaanera kattuffimmi siulittaasup John Thorsenip nassuiaatissaqartippaa. Elite Sport Greenlandimmi angutit arsaattartut kisiisa aningaasaliiffiginikuummagit.

Tamaannalu pissutaalluni angutit immikkut ukkatarineqarnikuusut nassuiaatigaa.

Arnat angutillu illup iluani arsaannermi nunanut allanut unammisartui 2021-imi Island gamesertoqalerpat sungiusaasoqalernissaat kattuffiup neriorsuutigaa.