Arsaannermi nuna tamakkerlugu sungiusaasoq eqeeqqusivoq: Arsaattartut piareersimanerusariaqarput
Arsaannermi kalaallit nunanut allanut unammisartuiniittut arsaannikkut suli piareersimanerusariaqarput.
Nuna tamakkerlugu sungiusaasoq Morten Rutkjær taamatut oqariartuuteqarpoq sapaatip akunnera kingulleq Nuummi sungiusaqatigiittoqareersoq.
- Arsaattartut arsaannermi piareersimassusaat inissisimaffigitikkusutannut suli killinngilaq. Suli aqqutaa takivoq, nuna tamakkerlugu sungiusaasoq Morten Rutkjær KNR-mut oqarpoq, itisiliillunilu:
- Qasujaassuseqarluarput kisianni arsaannermi arsalerisinnaasutsikkut taktikkimilu suli iluarsisassaqarput. Arsalerisinnaassutsimi taktikkimilu amigaateqarnerannut pissutaaneruvoq sungiusarnerit unamminerillu suli amigarmata, Morten Rutkjær oqarpoq.
Imaanngilaq arsaattartut pualavallaartut arsaassinnaassusaalli killeqarpallaarluni.
AAMMA ATUARUK Arsaannermi nunanut allanut unammisartut: Nivallutalu sakkortuumik sungiusarpugut
Nunanulli allanut unammisartut ilaannakuusorujussuit sapaatip akunnerata naanerani siuliani sungiusarpai.
Nuummi coronamik tunillatsittoqarmat Nuummiit Nuummullu angalanerit matuneqarput. Nuummiit peqataasussat arlallit aamma mattusimagallartitaapput coronamik tunillatsissimasup peqataaffigisaani kaffillertuniissimanertik pissutigalugu.
AAMMA ATUARUK Arsaannermi kalaallit FC Nordsjælland unammissamaalerpaat
Peqataasinnaanngikkallartulli eqqaanngikkaluarlugit nuna tamakkerlugu sungiusaasoq Morten Rutkjær isumaqarpoq peqatigiiffinni ivigaasaaqqani sungiusanermi arsaattartut tamaviaartinneqarnerusariaqartut.
Sungiusaasut pikkorinnerusut
- Peqatigiiffiit maanna attavigiortorpakka sungiusarnermi atukkat pitsaanerusariaqarnerat pillugu. Sungiusaqatigiinnermi arsaattartut killiffimminniit suli pitsaanerujussuusariaqarput, Morten Rutkjær oqarpoq.
- Qanoq iliorluni sungiusarnermi atukkat pitsaanerulersinnaappat?
- Arsaattartut sungiusarnermut takkuttuartut 16-18-it missaanniittariaqarput. Sungiusaasut aamma sungiusariaatsinik eqqortunik atuinissaat pingaaruteqarpoq qasujaallisaanikkut imaanngitsoq takisuumut arpannikut. Sungiusakkat eqqortut atorneqarnissaat pingaarnersaavoq, Morten Rutkjær oqarpoq. Taanna ulluinnarni Holbæk Sportsakademimi ilinniakkamut akisussaasuuvoq.
Nunanut allanut toqqarallakkat augustip aallartilaarnerani Ilulissani GM-rtoqarnerani katersuuteqqissapput GM-lu naammassippat unammisartut 22-it toqqarneqassapput.
Nunanut allanut unammisartut septemberimi Danmarkimukassapput tassanilu Superligami unammisartut FC Nordsjælland unammissavaat.
