Arsaannermi nunanut allanut unammisartut: Nivallutalu sakkortuumik sungiusarpugut
Silami arsaannermi nunanut allanut unammisartut aallartinnissaat erinitsaanneqartoq pivoq.
Nuna tamakkerlugu sungiusaasoq Morten Rutkjær aamma sungiusaasup ikiortaa Nukannguaq Zeeb qaammatit arlaqanngitsut qaangiuppata 22-nik toqqaassapput. Maannakkuugallartorli Morten Rutkjær 40-ut missaanniittunik toqqagassaqarpoq.
Toqqarallakkaniittut maanna paasitinneqarput toqqagaavinnissamut sunik piumasaqartoqarnersoq.
AAMMA ATUARUK Arsaannermi kalaallit FC Nordsjælland unammissamaalerpaat
Toqqaagallartoqarneraniit piumasarineqarpoq arsaattartut qasujaallisarluarsimassasut.
- Arsaattartut siornatigorniit qasujaannerullutillu sungiusarluarsimanerupput. Taamaattoq maluginiarnarpoq ukioq naallugu futsalimik sungiusarsimasut aamma futsalersimanngitsut assigiinngissuteqarnerat. Futsalimi sungiusarsimanngitsut tamaviaarnermi ippigisaqaqqajaanerat malunnarneruvoq, nuna tamakkerlugu sungiusaasoq Morten Rutkjær KNR-mut oqarpoq.
Superligameersut unammissavaat
Sapaatip akunnera kingulleq Nunatta kujasinnerusortaaneersut Nuummi sungiusaqatigiipput avannaamiullu sapaatip akunnera una Ilulissani sungiusaqatigiillutik. Nuummili sungiusarneq pisinnaaniassammat Nuup arsaaffissua arsaattartut nivaqqaartariaqarsimavaat.
AAMMA ATUARUK Toqqaaneq: Aajuku isikkamik arsaannermi nunanut allanut unammisartutut toqqarallakkat
Toqqarallakkat tamarmiullutik junimi Nuummi naapissapput sungiusaqatigiinnerlu naggaserlugu inuiattut ullorsiornermi avannaa kujataalu unammissallutik.
Arsaannermi GM augustip aallartilaarnerani Ilulissani pisussaq sungiusaasoqatigiit aamma malinnaaffigissavaat. Tassani takutitsilluartut malinnaaffigereerneranni unammiartortussat 22-it toqqarneqassapput.
Septemberip aallartilaarnerani sungiusariaqartoqassaaq. Toqqakkallu piumasaqaatinik assigiinngitsunik naammassinnissimanissaat piumasaqataavoq.
- Kikkut sungiusarluarsimappat, kikkut qasujaappat, kikkut arsaateriaatsimik atorusutatsinnik aallusserusuppat kikkullu iligiinnut iluaqutaasinnaaneruppat, Morten Rutkjær oqarpoq.
Nunanut allanut unammisartut septemberimi FC Nordsjællandimut superligami normu 5-tut inissittunut unammissapput.
Danmarkimut angalanissamut toqqagaanngitsut suli periarfissaqarumaarput siunissami nunanut allanut unammisartuniilernissamut.
- Aamma unammilleqatigiinnerput peqqinnartuuvoq angalataassagaanni tunniussaqarsimanissaq. Aamma tunniusaqaqqaarluni nunanut allanut unammisartuniinnissap ileqquulernissaa anguniagaraarput. Tamanna nunanut allanut unammisartut siunissami sakkortunerulissutigisinnaavaat, Morten Rutkjær oqarpoq.
FC Nordsjællandip unamminerup saniatigut nunanut allanut unammisartut iligiinnut Jyllandimeersunut unammissapput. Taakku kikkuunerat kingusinnerusukkut nalunaarutigineqassaaq.
