Arnat ulluanni assassukkanik tuniniaapput

-Ullumikkut Arnat Ulluat, marsip arfineq-pingajuat, nalliussiniarlugu maani katersuuttarpugut. Illuuterput ullumikkut ammarparput nalunaaqutaq ataatsimut, inuit piumasut kikkulluunniit kaffisoriakaapput, kaageqarlunilu pivoq. Assassukkanik aamma tuniniaavugut, pisisoqangaatsiarpoq, taavalu ataqqinaammik ilaasortarput suliaminik ingerlatsilluni maani peqataavoq, assassukkaminillu takutitsilluni. Tamatta peqataavugut, assut nuannerpoq, inuit isaasut amerlanermik. Arnat Ullorisartagaat una uagut aamma pinngitsoornata ukiut tamaasa malunnartittarparput, nuannareqigatsigu, ullorlu assut pissarsiffigisarparput illoqarfimmiut aggiasut peqatigalugit, nuannarisaqaarput inuppassuit aggertarmata.

Taama oqarpoq Nanortalimmi arnat illuanni ukiuni 42-ni ilaasortaasimasoq, ukiunilu 25-ni siulittaasuusimasoq, Kathrine Petrussen.

Naalakkersuisuusuni arfineq-marlunni arnaq ataasiinnaavoq. Inatsisartuni ilaasortat pingajorarterutaat arnaapput, kommunalbestyrelsimilu ilaasortat sisamaagaangata ataaseq arnaasarpoq.

Demokraatit tusagassiutinut taama nalunaaruteqarput, kommunalbestyrelsemullu qinersinissamut arnat amerlanerit qinigassanngorteqqullugit kajumissaarpaat.