Arnat spiralilersorneqarsimasut siulliit taarsiivigineqartut
Arnat sisamat siulliit spiralilersuisimanermut atatillugu taarsiivigineqarput amerlanerillu aamma ullup ingerlanerani taarsiivigineqarnissaat ilimanaateqarpoq.
Patienterstatningip arnanut spiralilersorneqarsimasunut 300.000 koruuninik taarsiiviginninnissamut tamannalu Folketingimiit aggustip 27-anni akuerineqartumut akisussaasuusup paasissutissiissutigaa.
- Maannakkut aallartissinnaanerput nuannaarutigeqaarput, Trine Berner Madsen naartunaveersaasersorneqarsimasut taarsiivigineqarnissaannut suliniummi Patienterstatningen sinnerlugu aqutsisoq oqarpoq:
- Arnat spiralilersorneqarsimasut pisariaqartitaannik inerniliinissarput neriuutigaarput.
Patienterstatningen suliat sisamat naammassineqartut saniatigut, taarsiivigineqarnissamik qinnuteqaatinik 349-nik aamma tigusaqarsimavoq.
Suliat sisamat tamarmik arnanut 300.000 koruuninik taarsiiviginninnermik inerneqarput.
Trine Berner Madsen arnanut spiralilersorneqarsimasunut toqqaannartumik aamma kajumissaaruteqarpoq:
- Arnat qinnuteqassapput erseqqissaavigineqarniassammata aamma ikiorusuttorujussuuagut. Attavigineqarnissatsinnut kikkut tamaasa tikilluaqquagut, suliallu ilissinnut tunngasut misissukuttoorsinnaallugit.
- Nalornissuteqaraanni sianertoqarsinnaavoq.
Taassuma aamma, naartunaveersaasersorneqarsimasut qinnuteqaataat allanit sulianit piumasaqaatitakinnerunerat oqaatigaa, tassa inummut tunngasut taamanikkut allattukkat paasissutissalluunniit takutinneqartariaqanngimmata.
Peqqissutsimut ministerip Ida Aukenip (Socialdemokratiet) taarsiissuteqarneq arnanut spiralilersorneqarsimasunut eqqississutaanissaa neriuutigaa.
KNR-illi toqqaannaq aperimmani, spiralilersuisimanerup naammassineratut taarusunngilaa:
-Taassuma pisup taama sivisutigisup sakkortutigisullu naammassineqarnissaa siusippallaarunarpoq, Ida Auken oqarpoq:
- Neriuppungali amerlasuut eqqissiimissasut nunattalu akornanni saammaasseqatigiittoqarnerulernissaa neriuutigalugu.
Ikiuussinnaasoqartoq
Trine Berner Madsen palasit ataatsimiinnerannut peqataavoq, tassa palasit arnanut spiralilersorneqarsimasunut ikiuisinnaaniassammata saqqummiussilluni ulluni makkunani Sisimiuniippoq,
- Palasit arnanut ikiuussinnaapput. Arnat misigisimasatik oqaluusereqqikkunikkit amerlasuut misigissutsimikkut sunnertisimanissaat naatsorsuutigaarput, taamaammat oqaloqatigiissutiginissaannut palasit orninneqarsinnaapput, Trine Berner Madsen oqarpoq.
Patienterstatningen arnat spiralilersorneqarsimasut taarsiivigineqarnissamut suliaannik ikiorniarlugit arlalinnik suliniuteqarpoq.
Ilaatigut Odensemi, Aalborgimi, Aarhusimi Københavnimilu Kalaallit Illuini sapaatip akunnerata tulliani paasissutissiisoqassaaq.
Septembarip 28-anniit oktobarip 22-ata tungaanut Ilulissanut, Uummannamut, Aasiannut, Qeqertarsuarmut, Qasigiannguanut, Maniitsumut Nuummullu tikeraartoqassaaq. Saniatigullu aappaagu upernaakkut angalanissanik marlunnik pilersaaruteqartoqarpoq, tassani angalasussat Tunumut, kitaanut kujataanullu angalassapput.
- Arnat oqaloqatigisimasagut kiisami qinnuteqarsinnaalernertik nuannaarutigaat, Trine Berner Madsen oqarpoq nangillunilu, nuannaarutigalugu arnanut kalaallisut oqaloqatiginnissinnaasumik suleqatitaarsimallutik.
Patienterstatningen sulianik juulilli aallaqqaataanni suliaqarpoq, naak taarsiivigineqarnissamut inatsit septembarip aallaqqaataanni aatsaat atuutileraluartoq.
Taamaattumik suliat siulliit aalajangiiffiginiarneri sukkasinnaapput, naak Patienterstatingip sulianik aalajangiiniarnera nalinginnaasumik qaammatini pingasuni sivisussuseqarsinnaasaraluartoq.
-Arnat sivisuumik utaqqinikooqimmata sukkasuumik suliarinissaat uatsinnut pingaaruteqarpoq. Ukiunimi qulikkuutaani sakkortuumik misigisaqartitaasimanertik attassimavaat, Trine Berner Madsen oqarpoq.
Uppernarsaateqarnissamik pisussaaffiliinikinnerusoq
Trine Berner Madsenip naartunaveersaasersuisimaneq Patienterstatningip suliarisartagaanit allanit allaanerujussuunerarpaa:
- Kalaallit Nunaanni Danmarkimilu inuiaqatigiinnut tamanut sakkortuunik misigititsisimavoq taamaattumik suliaq aalajangeeqataaffigissallugu arnallu spiralilersorneqarsimasut naalliuutaasa qaangertinniarnissaannut uatsinnut pingaaruteqarluni.
Suliamulli tunngatillugu misigissutsit tungaatigut allaanerusoqanngilaq, aammali sulianit allanit naleqqiullugit uppernarsaateqarnissamik pisussaaffiliinikinnerujussuupput.
- Arnat 1991 tikillugu Kalaallit Nunaanni najugaqarsimasussaapput, piffissami tassani akuerseqqaaratik naartunaveersaaserneqarsimanermik uppernarsaallutik atsiussapput aammalu pisoq ilimanarsisinniarlugu nassuiaasiussallutik, Trine Berner Madsen oqarpoq.
Ida Aukenip qinnuteqartitsinermi piumasaqaatikinnerunissaq pingaaruteqarsoraa:
-Arnat naartunaveersaaserneqarsimasut tamaasa suliarinissaat uatsinnut pingaaruteqarsimavoq, peqqissutsimut ministeri oqarpoq:
- Ukiorpassuit qaangiutereeraluartut uppernarsaateqanngikkaluarlutilluunniit qinnuteqarsinnaanissaannut tulluartumik periusissiornissarput pingaaruteqarsimavoq.
Amerlanerusunik aningaasassaqarnissaq ammaffigigaa
Arnat spiralilersorneqarsimasut 4.500-t missaanniittut taarsiivigineqarsinnaanissaat siornatigut nalilerneqarpoq.
Inatsimmi akuerineqartumi allassimasoq naapertorlugu, taarsiissutigineqartussat katillugit 1,6 milliardit koruunit immikkoortinneqarsimapput, Ida Aukenili aningaasat amerlanerit atorfissaqartinneqassappata ammavoq;
- Qassit aningaasanik pissanersut killilernikuunngilarput kisianni pisariaqartitsisunut aningaasat immikkoortippagut, amerlanernilli takkuttoqassappat aningaasassarsiortariaqassaagut, taanna oqarpoq.
Ida Auken sapaatip akunnera una nunatsinniippoq, ilaatigut arnat spiralilersorneqarsimasut oqaloqatigiartorlugit.
- Misigisap attortinnarnissaan naatsorsuutigaara, tassami arnat sakkortoorujussuarnik oqaluttuassaqarput, Ida Auken ataatsimiinnginnermini oqarpoq:
- Arnat ilaat, sakkortoorujussuarnik misigisaqarsimasut Danmarkimi ataatsimeeqatigaakka. Tamanna qamuuna sunnertisimassutigaara uummatinniitippakkalu.
Qanoq qinnuteqartoqarsinnaanersoq Patienterstatningip nittartagaani takuneqarsinnaavoq aamma tassani oqarasuaatikkut sianerfissamik allaqqasoqarpoq.
