Ministerip arnat spiralilersugaasimasut ataatsimeeqatigiartorlugit nunatsinnukassasoq

Danmarkip peqqissutsimut ministeria Ida Auken(S), sapaatit akunnerata massuma ingerlanerani nunatsinnut tikeraassaaq, arnat kissaatiginngisaminnik spiralilerneqarsimasut ilaatigut naapissallugit.

Danmarkip peqqissutsimut ilageeqarnermullu ministereqarfia tusagassiorfinnut taama nalunaaruteqarpoq.

Ida Aukenip arnat pineqartut ilaat Københavnimi siusinnerusukkut naapinnikuuai.

- Arnat Kalaallit Nunaanniittut naapinnissaat qilanaaraara, oqaluttuassaallu tusassallugit. Arnat tapersersorneqarnissaat pingaartippara, Ida Auken, tusagassiorfinnut nalunaarummi ilaatigut oqarpoq.

Kalaallit arnartaat kissaatiginngisaminnik naalagaaffimmit 1960-imiit 1991-ip tungaanut spiralilersorneqarput. Kalaallit Nunaata peqqinnissaqarfik 1992-imi akisussaaffigilermagu spiralilersuisarneq piffissami aalajangersimasumi ingerlateqqinneqarluni.

Arnat niviarsiaqqallu 4070-it 1970-ikkut naalerneranni spiralilersorneqarsimasut, siorna 2025-mi qulaajaanerup takutippaa.

Arnat spiralilersuinermik nalaanneqartut tamarmik immikkut 300.000 koruuninik taarsiivigineqarnissaat, Folketingimi sapaatip akunnerata siuliani sisamanngormat akuersissutigineqarpoq.

Ministeriuneq Mette Frederiksen (S), naalakkersuisullu siulittaasuat Jens-Frederik Nielsen, Danmark Kalaallit Nunaallu sinnerlugit siorna 2025-mi utoqqatserput.

Naalakkersuisunut siulittaasuusimasup Múte B. Egedep, spiralilersuineq inuiannik nungusaanerusoq, 2024-mi oqaatigaa.

Spiralilersuineq inuiannik nungusaanerunersoq qulaajarniarlugu nalunaarusiat marluk naalakkersuisunit tallimanngormat saqqummiunneqarput.

Nalunaarutit taakku marluk tunngavigalugit inuiannik nungusaasoqarsimanersoq naalakkersuisut oqaatigisinnaanngilaat, meeqqanut, inuusuttunut, inatsisit atuutsinneqarnerannut naligiissitaanermullu naalakkersuisoq Mariane Paviasen Jensen oqarpoq.

Ida Auken nunatsinniinnermini peqqissutsimut inunnullu innarluutilinnut naalakkersuisoq Anna Wangenheim ataatsimeeqatigissavaa.

Marluullutik peqqinnissaqarfiup suleqatigiissutiginerulernissaa oqaluuserissavaat, tusagassiortunut nalunaarummi taama allassimavoq. 

- Kalaallit Nunaata Danmarkillu qanimut suleqatigiinnerat takuneqarsinnaasariaqarpoq, pingaartumik peqqinnissaqarfiup iluani, Ida Auken oqarpoq. 

RITZAU