Arnat nunanut allanut unammisartut angalalersut: Sineriammi meeqqat inuusuttullu sungiusaleraat

Nunatta assammik arsaannermi nunat allanut unammisartui arnat septembarimi nunatsinni angalalerput. Illoqarfiit taakkunanilu najugallit assammik arsaattartut tikeraassavaat.

Allattoq Christine Hyldal

aggustip 30-at 2023 17:28

Nutserisoq Sussi Jensen

Nunarsuaq tamakkerlugu arnat assammik arsaallutik pissartanngorniunnermut anngunniunnerat Nuummi Inussivimmi juunimi ingerlanneqarpoq. Nunarput tassani ajugaasaqattaareerluni ajugaaniutivinnermi Canadamut unamminerminni 17-15-eraarluni ajugaavoq.

Arnallu assammik arsaattartut maanna septembarimi nunatsinni angalalerput, Timersoqatigiiffiit Assammik Arsartartut Kattuffiat (TAAK) tusagassiorfinnut nalunaarummi taama allappoq.

Arnat nunanut allanut unammisartut Nuup avataani illoqarfinni qanimut naapinneqarsinnaassapput, TAAK oqarpoq.

Tamanna illoqarfinni ukunani pissaaq:

Qaqortumi: septembarip 9-at 10-ngallu

Ilulissani: septembarip 16-iat 17-iallu

Aasianni: septembarip 16-iat 17-iallu

Sisimiuni: septembarip 23-iat 24-iallu

Maniitsumut Paamiunullu tikeraarnissaat pilersaarusiorneqaleruttorpoq ullulerneqarumaarlunilu.

Pisussani nunanut allanut unammisartut meeqqanik inuusuttunillu sungiusaallutillu unammisitsissapput.

TAAK-imi siulersuisut NunaFonden Unicefilu suleqatigalugit angalaarnissaq pilersaarusiorpaat.

Aamma atuaruk Assammik arsarnermi VM: Stavanger kalaalerpassuit Islandimiorpassuillu ornissavaat

Nunarsuaq tamakkerlugu assammik arsaannermi pissartanngorniunneq Danmarkimi, Norgemi Sverigemilu novembarip 29-ianiit decembarip 17-iata tungaanut ingerlanneqassaaq.

Nunarput immikkoortumi iligiikkuutaat nuannarineqaqisut unammeqattaassavaat, taakkualu tassaapput Norge, Østrig kiisalu Korea.

Norge ukioq kingulleq Europa tamakkerlugu pissartanngorniunnermi aamma ukiut marluk matuma siorna kingullermik nunarsuaq tamakkerlugu pissartanngorniunnermi pissartanngorpoq.

Nutaarsiassami kukkunermik nassaarsimaguit uunga allaffigineqarsinnaavugut.