Arnaq savimmik kapisisutut pasisaalluni tigusaasoq
Savimmik kapisisoqarsimasoq, Tasiilami politiit sapaammi unnukkut arfineq-marlunngulersoq nalunaarfigineqareerput. Arnaq tamatuma kingorna tigusaavoq.
Arnarli tigusaq eqqartuussivimmut sassartissanersoq suli aalajanginngikkitsik, politiit pigaartuisa ningiuat Anette Ostenfeldt ilisimatitsivoq.
Savimmik kapineqartoq angutaavoq, angulli taanna qanoq innersoq ilisimanngikkitsik, politiit pigaartuisa ningiuat oqarpoq.
Tamatuma saniatigut allanik soorlu nakuusernermut angerlarsimaffimmilu eqqissiviilliornermut tunngasunik aamma ulapputeqarlutik, politiit aamma ilisimatitsissutigaat.
Umiatsiaaraq motooriiartoq
Savimmik kapisisoqarsimaneranik nalunaarfigineqariitsiaannarlutik umiatsiamik motooriiartoqarsimasoq, politiit pigaartui aamma nalunaarfigineqarput.
Taamaammat politiit angallataat annaassiniariartorluni ornigutilertorpoq, politiilli angallataat angummat umiatsiaaqqami motooriiartumi ilaasut angalaartunit allanit ikiorneqalereersimasut paasinarsivoq.
- Tassa umiatsiaaqqami motooriiartumi ilaasut tamarmik ajunngillat Nuummullu apuunneqareerlutik, Anette Ostenfeldt oqarpoq.
