Arnaq nakuusersimanini pillugu pinerluuteqaqqikkuni atuuttussanngortussamik eqqartuunneqartoq
Qaasuitsup Eqqartuussisoqarfiata arnaq 50-inik ukiulik arnamut allamut siorna aggustimi nakuusersimasutut eqqartuuppaa, arnaq pinerluuteqaqqissaguni ulluni 40-ni pinerluuteqarsimasunut inissiisarfimmiittussanngortinneqassaaq.
Kalaallit Nunaanni Politiit KNR-imut paasissutissiipput.
Unnerluussummi allassimasut malillugit arnap pinerlineqartup nikassaarpasissumik oqaaseqarnerata kingorna pivoq. Pisoq 2022-mi aggustip 22-ata 23-ata akornanni unnuami pivoq.
Arnap pinerlineqartoq taamani seqqagiuppaa, taamaalilluni niaqquminik nunamut tulluni, arnaq tamatuma kingorna arnamut ingeriarluni kiinaatigut arlaleriarlugu tilluarpaa.
Nakuuserfigineqarnini eqqaamanngikkaa
Pinerlineqartup ataasiarluni imaluunniit arlaleriarlugu tillunneqarnerluni imaluunniit pinerluuteqartoq nakuusernermini sioorasaaruteqarnersoq eqqaamanngikkaa eqqartuussivimmi saqqummiunneqarpoq. Taamaammat arnaq 50-inik ukiulik pinerlineqartumut ataasiaannarluni annertitsisimasutut pisuutinneqarpoq.
Unnerluussisussaatitaasut qaammatini pingasuni pinerluuteqarsimasunut inissiisarfimmiittussanngortinneqarnissaa piumasaraat, eqqartuussiviulli arnaq ukiut marluk ingerlaneranni pinerluuteqaqqissaguni ulluni 40-ni pinerluuteqarsimasunut inissiisarfimmiittussanngortippaa, politiit eqqartuussinerup kingorna paasissutissiipput.
Naak eqqartuussiviup unnerluutigineqartoq unnerluussisussaatitaasut piumasarisaanit allaanerusumik eqqartuukkaluaraa unnerluussisussaatitaasut eqqartuussiviup aalajangernera ilorrisimaarutigigaat, politiit KNR-imut allakkatigut akissuteqarlutik paasissutissiipput.
Unnerluutigineqartup unnerluussisussaatitaasullu eqqartuussut akueraat, taamaammat eqqartuussivimmi suliaq eqqartuunneqartoq ukiuni tulliuttuni marlunni assingusumik pinerluuteqaqqinngippat maanna naammassivoq.
