Politiit ullormut nalunaarutaat: Arnaq inuusuttoq angerlarsimaffimminni nakuuserfigineqartoq

Angut 30-t missaanni ukiulik aapparisani 24-nik ukiulik nakuuserfigisimasutut unnerluutigineqarpoq. Angutit marluk Sisimiuneersut sapaatip-akunnerata naanerani nakuusersimaneq pillugu suliami tigummigallarneqarput.
Assi © : Christine Hyldal/KNR
juulip 07-at 2025 10:39
Nutserisoq Karla Heilmann

Ullup unnuallu ingerlanerani pisut sisamat Kalaallit Nunaanni Politiit pigaartuisa pisortaata Aqqalu Petersenip ataasinngornermi ullaakkut erseqqissaatigai. 

Sulialli tamakkerlutik suli nutaajummata, politiiniillu suli misissorneqarmata oqaatigisinnaasai killeqarput. 

Maniitsumi angut 21-nik ukiulik aserorterisimasutut unnerluutigineqarpoq. Sumut aserorterisimanersoq pigaartut pisortaata oqaatigisinnaanngilaa.

Nuummi angut 30-t missaani ukiulik aapparisaminut 24-nik ukiulimmut nakuusersimasutut unnerluutigineqarpoq. Pisoq Nuup Nuussuartaaniit nalunaaqutaq 00.57 politiinut nalunaarutigineqarpoq.

- Angut suliami tassani unnerluutigineqarpoq, allamilli oqaaseqaqqissinnaanngilanga, pigaartut pisortaat oqarpoq.

Angutit taakkua marluk Sisimiuni arfininngornermi ullaakkut nakuusernerisa kingorna sapaammi eqqartuussivimmut sassartinneqaramik tigummigallagassanngortinneqarsimasut, tamatumunnga ilanngullugu pigaartut pisortaat oqarpoq.

Pigaartut pisortaata suliani kingullertut Narsami unnuap ingerlanerani ukiukitsoq ATV-mik aallarussisimasoq taavaa. Nalunaaqutaq 03.39 nalunaarutigineqarpoq, ukiukitsorlu pineqarmat isumaginninnermut oqartussaasut kalerrinneqarput, Aqqaluk Petersen oqarpoq.