Politiit ullormut nalunaarutaat: Angutit marluk toqutseriarsimasutut unnerluutigineqartut
09.21 nakuusertoqarneranik politiinut nalunaarutiginnittoqarpoq. Tamannalu angutit marlu toqutseriarsimasutut unnerluunneqarneranik inerneqartoq, Kalaallit Nunaanni Politiit pigaartuisa pisortaat Aputsiaq Hansen sapaammi ullaakkut oqarpoq.
- Pinerlineqartup ajoquserneri sualungaarmata aallaqqaammut suliaq sakkortuumik nakuusernertut suliarigaluarparput, Aputsiaq Hansen oqarpoq.
Pinerlineqartulli nassuiaanerata qanorlu innerata, suliaq maanna toqutseriarsimasutut suliassanngortinneqarpoq.
Angutit taakku marluk tigummigallagassanngortittut, politiinit imigassamik aalakoornartulittorsimasutut paasivaat, maannakkoqqissaarlu Sisimiuni eqqartuussivimmi tigummigallarneqarnissaat anguniarlugu sassartinneqarput, pigaartut pisortaat oqarpoq.
Misissuinerlu pissutigalugu itinerusumik oqaaseqarsinnaanngilaq.
Nuummi illoqarfiup qeqqani imigassartorsimatillutik biilimik ingerlatsisut
Inuit marluk Nuummi ullaaralaakkut alapernaarsuisuniit unitsinneqarput. Inuit taakku marluk illoqarfiup qeqqani nalunaaqutaq 04.50 aamma 04.55 unitsinneqarput.
Pisuni taakkunani marlunni imigassartorsimatillutik biilimik ingerlatsisutut pasineqarput, taamaattumik taakku marluutillugit promillii paasilluarumallugit aaverneqarput.
Inuk nalunaaqutaq 04.55 unitsinneqartoq sukkasuumik ingerlaarluni qullersuarmut aportoq, pigaartut pisortaat oqarpoq.
Inuit aalakoornartulimmik imersimatillutik biilimik ingerlatsinnginnissaannik Aputsiaq Hansen sakkortuumik kaammattuivoq.
- Imminut allanullu navianartorsiortitsineruvoq. Biili oqimaatsorujussuuvoq, taamaattumillu arriitsumilluunniit ingerlaaraluarpat allanut imminullu ajoqusiingatsiarsinnaavoq. Taamaammat akisussaaffimmik tigusisariaqarput imigassartorsimatillunilu biilimik ingerlatsinatik, taanna oqarpoq.
Taannalu ullup unnuallu ingerlanerani aalakoortunik angerlarsimaffimmi eqqissiviilliortunik aqqqusinermilu eqqissiviilliortunik suliaqarsimallutik oqaluttuarpoq. Taamaattoqarneralu sineriak tamakkerlugu atuuttoq, taanna erseqqissaavoq.