Politiit ullormut nalunaarutaat: Attumi seqqortoqartoq Arsuullu eqqaani SAR-imik annaassiniarneq

Nunaqarfimmi Attumi angut seqqorsimasoq ullaaralaaq tigusarineqarpoq, inuillu tallimat Aasiaat Radioatigut ajunaalernermik kalerrisaarinerisa kingorna tallimanngornermi SAR-imik annaanneqarput.
Aasianni politiit angummik silaannarmut seqqorsimasumik tigusariinittut, Nuummi politiit sinerissallu sinnerani pisunik imigassamut attuumassutilinnik ulapputeqartut.
juulip 05-at 2025 12:59
Nutserisoq Karla Heilmann

Nunaqarfimmi Attumi angutip ullaaq silaannarmut seqqornerata kingorna Aasianni politiit tigusaraat.

Pisoq politiinut nalunaaqutaq 05.42 nalunaarutigineqarpoq, tamatumalu kingunitsianngua angut tigusarineqartoq, pigaartut pisortaat Aputsiaq Hansen oqarpoq.

- Tigusarinninneq eqqissisimasumik naammassineqarpoq, suliarlu maanna misissuiffigaarput.

Taamaammat pisoq pillugu pigaatut pisortaat allamik oqaaseqarsinnaavallaanngilaq, erseqqissaatigaali nunaqarfimmi innuttaasut eqqissisimalluinnarsinnaasut.

Aasiaat Radioatigut Maydayertoqartoq

Pigaartut pisortaat aamma oqaluttuarpoq nunaqarfiup Arsuup eqqaani inuit tallimat angalaarlutik umiatsiaat immakkiartulermat Aasiaat Radioatigut tallimanngornermi ullaakkut nalunaaqutaq 08.10 Maydayimik nalunaarsimasut.

- Taamaammat politiit Issittumi Sakkutooqarfillu SAR-imik annaassinialerput, inuillu taakku tallimat annaanneqarput nunaqarfiliaanneqarlutillu, tamarmillu ajunngitsut, Aputsiaq Hansen oqarpoq.

Umiatsiarlu nunaqarfiliaanneqarsinnaasimasoq pigaartut pisortaat oqarpoq.


Imigassaq saqquminerpaasimasoq 

Pisut taakku marluk saniatigut ulloq unnuarlu ulapaarfiusimaqisoq, amerlasuunillu imigassamut attuumassutilinnik pisoqartarsimasoq, pigaartut pisortaat oqaluttuarpoq.

Nakuusernermiit, aqqusinermi eqqissiviilliornerit, angerlarsimaffinni eqqissiviilliornerit, persuttaannerit kiisalu imigassartorsimatillutik biilimik ingerlatsisut marluk nalunaarutigineqarput.

Imigassartorsimatillutik biilimik ingerlatsisut aappaa  unnuap aallartilaarnerani nalunaaqutaq 00.08 Nuussuarmi sukkasoorujussuarmik ingerlaartilluni qullersuarmut aporluni ajutoorpoq.

- Imigassartorsimatilluni biilimik ingerlatsisimasutut politiinit pasineqarpoq, taamaattumik biilimik aquttuusoq 20-nik ukiulik aaversippoq, maannalu akissutaa utaqqivarput, Aputsiaq Hansen oqarpoq.

Angut biilimi 18-it inorlugit ukiulimmik ilaasoqarsimavoq, inuillu taakku marluk ajutoornerisa kingorna ajoqusersimasut nakorsiartarfiannukaanneqarput. Marluullutillu inuunerminnik ulorianartorsiunngitsut, pigaartut pisortaat oqarpoq.

- Imigassartorsimatilluni biilimik ingerlatsisoqanngisaannarnissaanik kaammattuuteqarpunga, Aputsiaq Hansen oqarpoq.

Aammattaaq angajoqqaat meeqqatik imigassartorsimatillutik biilimik ingerlatsisumut ilaasaqqunagit oqaloqatigissagaat kaammattuutigaa.

Aalakoortunut isertitsivimmi silattorserneqartoq

Imigassartorsimatilluni biilimik ingerlatsisimasup aappaa Nuummi illoqarfiup qeqqani biilimik ingerlatsissalluni ikisoq nalunaaqutaq 04.05 takuneqarpoq.

- Angulli unitsinneqarpoq imigassartorsimalluni uuttuummut suputinneqarami killigititaq qaangerpaa. Taamaammat politiinit nakkutigineqarpoq, maannalu aalakoorunnaarnissaa utaqqivarput killisiorniassagatsigu.

Politiillu aamma taanna aaversippaat, suliamullu tassunga tunngatillugu qanoq pisoqarnissaa aaversinnerata inernera apeqqutaassaaq. 

- Tassa promillia apeqqutaassaaq, siornatigullu allanik pinerluuteqarsimanersoq suliallu tullissaa suussanersoq aalajangisuujumaarpoq, tamaammat tamanna pillugu allamik oqaaseqarsinnaanngikkallarpunga, Aputsiaq Hansen oqarpoq.