Politiit ullormut nalunaarusiaat: Arnaq aallaasilisarneragaasoq Paamiuni tigusaavoq

Arnaq 30-t sinnerlugit ukiulik aalakoortoq aallaasilisarluni illoqarfitsigoortoq aarleqqutigalugu Paamiuni innuttaasut ilaata sapaammi ualikkut tallimat qaangeraa kalerriutigigaa, Kalaallit Nunaanni politiit pigaartuisa ittuat Bent Johnsen KNR-imut ataasinngornermi ullaakkut paasissutissiivoq.

- Arnaq aalakoortoq aallaasilisarluni illoqarfitsigoorneragaasoq sioorasaarinngilaq, aallaasilisarlunilu illoqarfitsigoorluni angerlartoq aarleqqutigineqarpoq, politiit pigaartuisa ittuat oqarpoq.

- Politiit ornigutilertoramik arnaq taanna angerlamut apuutereersimasoq paasigamikku illua ungoriarlugu oqaloqatigalugu aneqqusareerlugu unnukkiartornerani arfininngunngitsiartoq animmat ajornaquteqanngitsumik tigusaraat, Bent Johnsen oqarpoq. 

Arnarli taanna iperagaareertoq eqqartuussivimmullu unnerluutigissaneritsik oqaatigisinnaanagu, politiit pigaartuisa ittuat oqarpoq.

Ikuallattoqarneranik kalerrisaarut aallartittoq

Nuummi ikummatissaasiviit ilaata ikuallattoqarneranik kalerrisaarutaa ataasinngornermi ullaakkut aallartimmat, politiit qatserisartullu ornigutilertorput.

Ikuallattoqanngitsorli, politiit pigaartuisa ittuat oqarpoq.

- Ikummatissaasiviup sarfaaruttoornera ikuallattoqarneranik kalerrisaarutip aallartinneranut pissutaavoq, Bent Johnsen oqarpoq.

Paamiuni Nuummilu pisut saniatigut allanik ulapaaruteqarnatik, taanna aamma oqarpoq.