Arnap 74-eriarluni iperartorneqarnera Iranimi kamaatigineqartoq
Arnap nutsaminik assersuinnginnami iperartorneqarnera Iranimi kamaatigineqarpoq. Inuit pisinnaatitaaffiinik ilungersuutigisaqartut nutaarsiassaqartitsivimmut dpa-mut taama paasissutissiipput.
Iranip eqqartuussiviata kurdistanimiu Roya Heshmati 74-eriarlugu iperartorneqartussanngortippaa.
Iranip eqqartuussiviata iperartuisimaneq uppernarsarpaa. Malittarisassat naapertorlugit iperartorneqarsimasoq, nunap eqqartuussiviisa nittartagaanni paasissutissiissutigineqarpoq.
Iperartuineq inuit internetikkut attaveqaqatigiittarfiini kamaatigineqartupilussuuvoq.
Arnaq nutsaminik assersugaqarnani nammineq assiminik inuit internetikkut attaveqaqatigiiffiitigut saqqummiussereerluni apriilimi tigummigallarneqalerpoq. Taamaattoqareersoq ukiuni 13-ini paarnaarussassanngortinneqarnerminut eqqartuussummik nangitseqqusivoq, paarnaarussassaajunnaarsinneqarlunilu. Iperartorneqarnissaanulli eqqartuussut atuutsinneqaannarpoq.
Arnap iperartorneqarfini ukiuni akullerni naalliutsitsisarfimmut eqqaanartutut taavaa.
Arnaq iranimiu Mahsa Amini 2022-mi septembarimi toqummat, Iranimi akerliussutsimik takutitsisoqarpoq.
22-nik ukiulik Mahsa Amini 2022-mi septembarip ulluisa 16-ianni toquvoq. Iranip ileqqorissaarnissamut politiivinit nakkutigineqartilluni ilisimajunnaarpoq, ullullu pingasut ilisimanngereerluni toqulluni. Oqartussaasut oqarnerat naapertorlugu Masha Amini nutsani assersorluarsimanngimmagit tigusarineqarpoq.
Ileqqorissaarnissamut politiit arnap inuusuttup toquneranut inuppassuarnit pisuutinneqarput.