Sulisuusimasut pisortaasimasumut: Atoqatigiinneq KNI-mi nalinginnaasumik oqaluuserineqarneq ajorpoq
KNI-p pisortarisimasaa Peter Grønvold Samuelsen arnanut sulisunut tallimanut kannguttaatsuliorsimasutut unnerluutigineqarpoq.
Pisortaasimasoq pinngitsuunerarpoq, arnalli tallimat tamarmik KNI-mi sulinerminni pisortaanerusimasumit piumanngisaminnik attuualaarneqartarsimallutik oqarput.
AAMMA ATUARUK KNI-mi pisortaasimasoq eqqartuussivimmi: Unnerluussutit tamaasa ilumuunnginnerarpai
Peter Grønvold Samuelsen suliffimmi persuarsiortuunngitsumik oqaluuteriaaseqartut, atoqatigiinnerlu pillugu quiasaarinertalimmik oqaloqatigiinnernut sivikisunut peqataasarsimalluni Eqqartuussisoqarfik Qeqqami sapaatit akunnerata siuliani eqqartuussinermut atatillugu nassuiaavoq.
Taamali oqarnera Moses Willumsenimit akerlilerneqarpoq. Taanna KNI-mi sulisuusimasut 21-t sinnerlugit ima oqarpoq.
- Tamanna ilumuunngilluinnarpoq, Moses Willumsen taama oqarpoq, nangillunilu.
- Sineriassuaq tamakkerlugu Siorapalummiit Ittoqqortoormiut ilanngullugit sulisumik ataatsimik taama politikkilimmik ataasiarlungaluunniit tusagaqarnikuunangalu takunikuunngilanga.
Pisortaanerusimasup oqarnera ilisarisinnaanngikkaat
Moses Willumsen KNI-milu sulisuusimasut 20-t allat tassani maanna sulisusuunit 28-nit atoqatigiinnerup nalinginnaasumik oqaluuserineqartarneranik oqarnermut aamma akerliliisunit taperserneqarput.
- Oqaatigineqartoq ilisarisinnaanagu oqariartuuteqarput. Atoqatigiinnermut tunngasunik eqqartuillutik imaluunniit eqqarsaateqarlutik suliartorneq ajorput.
Atorfillit Kattuffiata siulittaasua, Dina Olsen, KNI-mi maanna sulisuusut sulisuusimasullu kattuffimmut ilaasortat sinnerlugit taama oqarpoq.
Peter Grønvold Samuelsenip atoqatigiinneq KNI-mi nalinginnaasumik oqaluuserineqartartoq pillugu oqarnera sulisuusimasunut tujorminartoq, Moses Willumsen oqarpoq.
- Imaassinnaavoq inuk taanna nammineq taama kultureqarami kammalaatini qaninnerpaat ilagalugit taanna kultureralugu eqqartuisarsimasut. Tamannalu sulisorpassuarnut tutsinneqassanngilluinnarpoq.
Arnat ilisimannittutut nassuiaasut Peter Grønvold Samuelsenimit pukusumikkut, tuimikkut, siffiamikkut, qitimikkut, unimikkut nulumikkullu KNI-mi sulinerminni piumasarinngisaminnik attuaalaarneqartarsimallutik, eqqartuussivimmi oqarput.
Arnat arlallit eqinneqartarsimallutik taavalu uluamikkut pukusumikkullu aparneqartarsimallutik oqaluttuarput.
Februaarip naanerani eqqartuussissangasut
KNR-ip Peter Grønvold Samuelsen oqaaseqartinniaraluarpaa, taannali ilersuisualuunnit Finn Meinel, apersorneqarumanngillat.
Suliaq taanna sapaatit akunnerata siuliani eqqartuussissutigineqartussaagaluarpoq, ilisimannittulli ilaat coronalermat, suliami aalajangiinissaq kinguartinneqarpoq.
Februaarip naanerani eqqartuussisoqassasoq naatsorsuutigineqarpoq.
Unnerluussisussaatitaasut pineqaatissinneqarsimasunut qaammatini pingasuni inissiisoqassasoq piumasaraat, Peter Grønvold Samuelsen pinngitsuunerarpoq.