Arferit eqqissisimatinneqarnissaat Danmarkip illersorpaa
Danskit naalakkersuisui illuatungiliuttunit pisussaaffilerneqarpoq, imarpiup kujataani arfernik eqqissisimatitaaffeqarfimmik pilersitsinissamut akuersinissaa, nunat tamat arfanniarneq pillugu ataatsimiititaliarsua IWC juunip ulluisa 23-anni Chile-mi ataatsimeersuarpat. Tamanna folketingimi avatangiisit pillugit ataatsimiititaliap ullumi ataatsimiinnerata kingorna paasinarsivoq.
Kalaallit Nunaannut arfattassiissutigineqartut allanngortinneqassanngillat, imarpiup kujasinnerusortaani arfernik eqqissisimatatitaaffeqarfik pillugu siunnersuummut Danmark akuersippat, tamannalu Socialistisk Folkepartiimit Socialdemokratiniillu iluarisimaarneqarpoq.
Imarpiup kujataani eqqissisimatitsineqalerpat, imarpiup avannaani eqqissisimatitsinermik piumasaqalernissaq Kalaallit Nunaannit ernumassutigineqarpoq. Kalaallit Nunaat 200-inik tikaagullitassinneqarnikuuvoq.
Imarpiup kujataani arfanniartoqarneq ajorpoq, tamassumalu attatinnarnissaa Danskit nunanut allanut miniserianit Per Stig Møllerimit pissussimasoortutut isumaqarfigineqarpoq. Imarpiup kujataani arfernik eqqissisimatitaaffeqarfimmik pilersitsisoqassanersoq nunat tamat arfanniarnermut ataatsimiititaliasuata IWC-ip ilisimatuussutsikkut komite-anit nalilersorneqassaaq.
- Imarpiup kujataani arfanniarneq pillugu aalajangerneq imarpiup avannaanut sunniuteqannginnissaa pingaartiparput, Per Stig Møller oqarpoq.
Kalaallit Nunaat Savalimmiullu arfanniarneq pillugu aalajangernernut ernummassutissaqanngillat, danskit nunanut allanut ministeriat Per Stig Møller ritzau-imut oqarpoq.
Nungusaataanngitsumik arfanniarsinnaaneq illersorparput, tamanna naalagaaffeqatigiinni isumaqatigiissutigaarput, Per Stig Møller oqarpoq.
Arfanniarfiunngitsumi nungusaataanissamillu ernummateqarfiunngitsumi eqqissisimatitsiniarneq, Kalaallit Folketingimut ilaasortaatitaata aappata Juliane Henningsenip paasiuminaatsippaa,
Juliane Henningsenip ernumatigaa imarpiup kujataani eqqissisimatitsineqalerpat imarpiup avannaani eqqissisimatitsinissamik kinguneqarnissaa.
