Nunatta kujataani aalisakkerinermi ingerlatseqatigiiffik, Arctic Prime Fisheries ukiuni tallimani pingajussaanik millioninik amigartooruteqarpoq.Assi: Nick Rahaim/Flickr Creative Commons

Arctic Prime Fisheries millioninik amigartooruteqartoq

Kujataani ingerlatseqatigiiffik, Arctic Prime Fisheries ukiuni tallimani kingullerni 50 millionit koruunit missaannik amigartooruteqarpoq.

Nunatta kujataani aalisakkerinermi ingerlatseqatigiiffik ukiuni tallimani pingajussaanik millioninik amigartooruteqarpoq.

Ingerlatseqatigiiffik 35 millionit koruuninik 2020-mi amigartooruteqarpoq ingerlatseqatigiiffiullu nammineq aningaasaatai taamaalillutik 200 millioninik amigartooruteqarfiulerlutik.

Tamanna ingerlatseqatigiiffiup ukiumoortumik nalunaarusiaani allassimavoq.

AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput

Arctic Prime Fisheriesip amigartooruteqangaatsiarneq kingulleq coronap nunarsuaq tamakkerlugu tuniluunneranik pissuteqarnerarpaa, tamannalu pissutigalugu ingerlatseqatigiiffiup kilisaatissaa nutaaq kinguaattoortoq kilisaatillu allap iluarsartuunnera aamma sivitsorneqarnerarlugu.

Arctic Prime Fisheriesip oqarnera naapertorlugu tamanna pissutaalluni ingerlatseqatigiiffiup saarullittassani qaleralittassanilu tamakkerlugu aalisarsinnaasimanngilai.

Piginneqatigiiffilli ajornartorsiorneroratarsinnaavoq. Tassami piginneqatigiiffik Akileraartarnermut Aqutsisoqarfimmiit 50 millionit koruuninik pissaqarluni ukiuni kingullerni tallimani naatsorsuutiminut ilanngullugit allattarsimavoq.

50 millionit koruunit ingerlatseqatigiiffiup naatsorsuutaanut ilaapput, naatsorsuuserisulli ingerlatseqatigiiffiup aningaasarpassuit taakku pissarinerai uppernarsaatitassartaqanngissoraa.

AAMMA ATUARUK Emanuel Nûko Partii Naleraq: Tunumi umiarsuarmik tunitsivimmik perusuppugut

Ingerlatseqatigiiffiup tamanna siusinnerusukkut naatsorsuutini aamma oqaatiginikuuaa, ingerlatseqatigiiffilli aningaasanik pissaqarnerminik taakkunani aamma uppernarsaasinnaanngilaq.

Ingerlatseqatigiiffiup siulersuisuinut siulittaasoq, Jørgen Wæver Johansen qaammat una siulittaasuujunnaarpoq, Arctic Prime Fisheriesillu siulersuisuinut siulittaasortaava, Gudmundur Kristjansson aviisimut Sermitsiamut ima oqarpoq:

- Taassuma, ingerlatseqatigiiffimmilu piginneqataasut allat uangalu illuatungeriilluta tamanna isumaqatigiissutigaarput. Arctic Prime Fisheriesip aaqqissuuteqqinneqarnissaa pisariaqartinneqarami, siulersuisut siulittaasortaavat oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat