Emanuel Nûko Partii Naleraq: Tunumi umiarsuarmik tunitsivimmik perusuppugut
Emanuel Nûkop oqarnera naapertorlugu aalisagaqangaatsiarpoq, kisianni tunumi aalisartunut taamaallaat Kuummiuni saarullinnik qaleralinnillu tunitsiveqarpoq.
- Takorloorpara tunisat amerleriarnissaat, umiatsiaararsortullu aningaasarsiornissaannullu periarfissinneqarnissaat.
Aalisartulli Kulusuup Tasiilallu eqqaaneersut angallateerallit saarullinnik usingaatsiarsinnaanngillat. Aamma imaq mallertillugu Kuummiunut 40 km missaani isorartutigisumut tunisiartornissaat ajornakusoortartoq, Partii Naleqqap Tasiilami immikkoortortaqarfianeersoq, Emanuel Nûko oqarpoq.
AAMMA ATUARUK Arctic Prime Fisheriesip Kuummiuni tunitsivik ammaqqippaa
- Ukiassariartornera ilutigalugu anorlernerusalerpoq, umiatsiakinnerusunut sissuernarnerulerlunilu aamma umiatsiakitsunut Kuummiunut tunisiartornissaq ungasittorujussuuvoq, pingaartumik pisaqarluarsimagaanni, Emanuel Nûko oqarpoq.
Kisianni Kulusuup eqqaani tunitsivimmik umiarsualiisoqassagaluarpat, tamanna Kuummiuni tunitsiviusumut kingunerluuteqassasoq, Kuummiuni tunitsiveqartitsisumik Arctic Prime Fisheriesimik piginneqataallunilu ingerlatsinermut pisortaaqataasoq, Robert Møller, oqarpoq.
- Kingunerisinnaavaa uagut imminut akilersinnaasumik tunisassiorsinnaasusitsinnik innarliingaatsiarneq. Taavalu taamatut ingerlaannassappat soorunami uagut angujartuinnavilluta ingerlalissagaluarpat taava nalilertariaqassavarput qanoq imminut akilersinnaatigiva tunisassiorfitta ingerlaannarnissaa.
AAMMA ATUARUK Arctic Prime Fisheries eqqugaasoq
Robert Møllerip assersuusiaraa, kitaani tunitsivinni ingerlalluartuni ukiumut 4.000 tonsinik tunisisoqarsinnaasartoq, tunumili saarulleqarluaraangat Kuummiuni tunisassiorfimmut ukiumut 400 tonsit tunineqartarlutik.
- Taamaammat tunisassiarineqartartut killeqareerput, aamma pingaaruteqartorujussuuvoq tunisassiat annertunerunissaat, taamaalilluni imminut akilersinnaassusaat pitsaanerujartortussaagami, Robert Møller, oqarpoq.
