Arctic Prime Fisheriesip Kuummiuni tunitsivik ammaqqippaa
Uumasut nakorsaqarfiup Inuussutissalerinermullu oqartussaqarfiup aasap ingerlanerani suliffissuaq ammaqqissinnaasutut naliliiffigisimavaat.
Suliffissuup qerititsivia 300 tonsinik imaqarsinnaavoq.
Arctic Prime Fisheriesip nalilerpaa naammaginartumik ingerlassagunik minnerpaamik 150-200 tonsillu akornanni tulaassuisoqartariaqartoq.
Tamanna pissutigalugu suliffeqarfiup inuussutissarsiortut, kommuni Namminesorlutillu Oqartussat kajumissaarpai aalisarnermik ineriartortitseqataaqqullugit. Soorlu atortunik nutarterinikkut siunissamilu aalisartuusussanik ilinniartitsinikkut.
Kuummiuni tunisassiorfik Arctic Prime Fisheriesimit ukiut qulit qaangerlugit ingerlanneqarsimavoq. 2004-miit 2014-imut ukiumut agguaqatigiisillugu 92 tonsinik tunisisoqartarsimavoq, 2009-mi amerlanerpaagamik 131 tonsiusut ikinnerpaangamik 2010-mi 56 tonsiusimasut.
Sapaatip akunnerata siuliani nalunaarutigineqarpoq Naalakkersuisut Tunumi umiarsuarmik tunitsiviliiniarlutik akuersissuteqarsimasut. Maannamulli suli ilisimaneqanngilaq qaqugu umiarsuaq tappavunga apuutissanersoq.
