Niuertarfiit pioreersut unammillernissaq qilanaaraat

Unammillerteqaleqqinnissartilli qilanaaraat.

- Unammillerniartut tamaasa tikilluaqquagut, niuerfinnilu nutaamik ilaqalernissarput pissangagaarput, Pisiffimmi pisortaaneq, Per Steen Larsen taama oqarpoq, Arctic Importillu Ilulissani pisiniarfiutaanik unammilligaqareerlugit erseqqissaatigalugu.

Unammillerneq pisiniartartunut ajussanngeqaaq

Nuummilu Brugseni illoqarfimmi pingasunik pisiniarfiuteqartup nalunaarutaa paasinngitsoorneqarsinnaanngilaq.

- Unammillertissat soorunami tikilluaqquakka, pisiniartartunullu ajussanngeqaat, uagutsinnullu eqeersimaarnerulersitsissapput, Kalaallit Nunaanni Brugsenimi pisortaq, Susanne Christensen taama oqarpoq.

Aamma atuaruk Arctic Importip Brugseni Pisiffillu unammillerpai

Taassumalu Nuummi niuertarfissuarnik allanik inissaqarnersoq oqaatiginissaa suli siusippallaarnerarpaa.

 - Ullumikkumit periaatsitsinnit allaanerulluinnarpoq, pisiniartartulli nuannarissaneraat apeqqutaavoq, Susanne Christensen oqarpoq.

Pisinniarfissuarmut inissaqarpoq

Niuertarfiit suli amerlavallaalersimanngitsut, Pisiffimmit illoqarfimmi niuertarfissuarnik sisamanik ingerlataqartumit isumaqarput.

- Nuuk illoqarfiuvoq ineriartorfiunngaatsiartoq, taamaammat pisinniarfissuarmut taamannak angissusilimmutk inissaqartoq isumaqarpunga, Per Steen Larsen oqarpoq.

 Brugsenimit akikitsuerniarfimmut nutaamut qanoq unammillissanerlutik oqaatigisinnaanngilaat.

- Qanoq periaaseqarniarnersut suli nalugatsigu, taamatuminnga eqqarsaasersunngilagut, Susanne Christensen oqarpoq.

Unammillingaatsiassapput

Piniarfimmulli nutaamut unammillingaatsiassallutik, Pisiffimmiit neriorsuipput.

- Akitsuutinik angallassinernillu assigiinnik aningasartuuteqartassaagut, akillu sapaatip akunnikkaarlugit malinnaaffigisassavagut tulluarsartarlugillu, Per Steen Larsen oqarpoq.

Aperaagullu taakkunani akit apparpata taava namminneq akigititatik appassaneraat.

- Aap, uammillertigut malinnaaffigissavagut, Per Steen Larsen oqarpoq.