Arctic Importip Brugseni Pisiffillu unammillerpai

Arctic Import ulluinnarni atortussanik niutarfeqarnikkut unamminiartorsuanngorpoq, namminnerlu taanerattut "niuertarfik akikitsuutilik" qaammatip naanerani Nuummi ammassaaq.
Kommende discountbutik i Nuuk
Kommende discountbutik i Nuuk Assi © : Jonas Fievé/KNR
Allattoq Jonas Fievé
apriilip 17-at 2016 14:49
Nutserisoq Connie Fontain

- Super1 Aamma Discount ammarutsigu, pisiassaatigut annikitsukkaat assigiinngitsorpassuit pisiniartartussanit takuneqarsinnaassapput. Pisiniarfittaassamik piareersaasoq, Arctic Importimi pisortaq, Allan Frost taama oqarpoq.

Pisiassalli akikitsut saqqummersinneqartussat suliarigaluarlugit pisiniartartussat qanoq sipaaruteqartigissassanersut maannakkorpiaq Allan Frostip oqaatigisinnaanngilaa.

- Neqeroorutitta aviisia siulliup saqqummernissaa takoqqaalaariartigu, pisiniartartussallu nammineq isummersortillugit. Aalajangersimasumik procentinngortitsinngilagut, Allan Frost oqarpoq.

Akit appasissut qaffasissulluunniit. Ulloq siulleq aallarnerfigalugu pisiniartorpassuaqarnissaq Arctic Importip naatsorsuutigissanngilaa, Nuummi Niuernermik Ilinniarfimmi niuernermut tunngasunik ilinniartitsisoq oqarpoq.

- Soorlu ullumikkut pisinniaraangatta pisinniarfimmi ataatsimi pisinniartarpugut soorlu Brugsenimut iseraangatta maani Nuummi suna tamaat pigisarpaat taanna pisiniariaaseq ullumikkut taanna pigivarput, Frederik Lundblad taama oqarpoq.

Brugseni Pisiffillu niuertarfinnik akikitsuutilinnik unammillernerujussuusussaasut Frederik Lundbladip unnersiuutigaa. 

Niuertarfeerannguuvoq, ingerlatsinissami piareersaanissamilu aqutsinermi naleqqunnerusoq, assersuutigalugu nioqqutissanik akikitsitsiniaalluni akisuumik quersuarniititsinani nioqqutissat umiarsualivimmiit toqqaannartumik niuertarfiliaanneqartassapput, Arctic Importilu naapertorlugu taamaaliornikkut pisinianut pilerinarsarneqassaaq.

- Kvadratmeterinik sipaaruteqarujussuarpugut, nioqqutissallu piniarfimmut eqqussorneqartussat suliarinerani aamma sipaaruteqarluta. 

Arctic Importili nunatsinni arlalinnik pisiniarfiuteqareeraluartoq taakku pisiniarfiit aamma akikitsunik nioqquteqartarfinngortinnissaasa oqaatiginissaa suli siusippallaarpoq.

- Tamanna qanoq tiguneqassanersoq arlaannillu aaqqiissuteqarnissaq aamma qularnanngilaq taamaammat takoqqaarniarlugu aalajanngerpugut. Iluatsitsilluaruttali soorunami sumiiffinni allani aamma ammaanissatsinnut ammavugut. Arctic Importimi pisortaq oqarpoq.