Arctic Green Foodip sulisuni angerlartippai

Aktienik piginneqatigiissutinik aningaasaateqartut 5,2 millionit koruuninik Arctic Green Foodimut aningaasaliinissaannut piarersiimasut, tusagassiuutinut nalunaarummi oqaatigineqarpoq.

Arctic Green Food ingerlaqqinnissaminut piumasaqaateqarpoq, tassalu aalisarnermut piniarnermut nunalerinermullu naalakkersuisoqarfik, suliffeqarfiup kiffartuussinissamut isumaqatigiissutaata sinneri 2,1 millionit koruunit tunniuppagit.

Aalisartut piniartullu tunisanit bonusisiassaat taamatullu suliffeqarfimmi sulisut feeriaqarnersiutissaat suli tunniunneqanngillaat.

Arctic Green Food nalunaarpoq, aningaasat taakku tunniunneqarsinnaasut aalisarnermut piniarnermut nunalerinermullu naalakkersuisoqarfiup kiffartuussinissamik isumaqatigiissummeersut sinneri 2,1 millionit koruunit Arctic Green Foodimut tunniuppagit.

-Akiliisinnaajunnaarpugut sulisuvullu angerlartillutigit. Ingerlatseqatigiiffiup Kalaallit Nunaanni tunitsiviini tamani suliaqarfiit tamaasa unipput. Kiffartuussinissamik isumaqatigiissutip aningaasartaasa sinneri akilerneqanngippata, aalisartut piniartullu AGF-imit feeriarnersiutissatik bonusiassatillu tigunissaat naatsorsuutigissanngilaat, Otto Starck Radioaviisimut oqarpoq.

Aalisarnermut Piniarnermut Nunalerinermullu Naalakkersuisoq Ane Hansen oqaaseqartinniaraluarparput iluatsissinaasimanatiguli, Arctic Green Food pillugu tusagaq radioaviisimit malinnaaffigineqarumaarpoq.