Arctic Green Food-ip qulaajaaffigineqarnera naammassingajalerpoq
Arctic Green Food kiffartussinissamik isumaqatigiissummik eqqortitsinersoq Aalisarnermut Piniarnermut Nunalerinermullu Naalakkersuisoqarfimmit ukiassarli qulajaaffigineqarpoq suliffeqarfimmut isornartorsiunerit arlaqartut kingunerisaannik.
Arctic Green Food-ip sinerissami tunitsivii amerlanerit siorna matoqqapput, naak tunitsiviit ammatinneqarnisaannut 11 millioner koruuninik akileraartartut akiligaannik suliffeqarfik pissarsigaluartoq
Tamanna akuerineqarsinnaanngilaq, Aalisarnermut Naalakkersuisoq Ane Hansen taamani taama oqarpoq. Kiffartuussinissamut isumaqatigiisut eqqortinneqarsimanngippat, aningaasat ilai Namminersorlutik Oqartussanut utertinneqarsinnaanerat Ane Hansen-ip misissortippaa. Aalisarnermut Naalakkersuisoqarfiup qulaajaanera suli naammassineqanngilaq.
- Naammassineqangajalissaq, ukioq 2012-imi pisut pillugit nassuiaatissaq februarip qiteqqunneqarnerani naaneraniluunniit naammassineqarnissaa utaqqineqarpoq.
Ane Hansen taama oqarpoq. Arctic Green Food tunitsvii amerlanerit siorna matoqqapput matoqqagallarlutilluunniit.
Namminersorlutik Oqartussani atorfillittat maanna misissuisinneqarput, suna imaluunniit sooq Arctic Green Food-ip tunitsivii matoqqatinneqarsimanersut, aamma kiffartuussinissammik isumaqatigiissummik eqquutitsisimanersut imaluuniit eqquutitsisimannginnersut.
Kiffartuussinissamik isumaqatigiissut eqqortinneqarsimanngippat tamanna qanoq kinguneqarsinnaanersoq pillugu Ane Hansen ima oqarpoq.
- Kiffartuussinissamik isumaqatigiissummi aningaasat tapiissutaasimasut siunertarineqartunut atorneqarsimanngippata utertitsinissamik piumasaqartoqarsinnaavoq aamma ajorluinnartumik pisoqarsimappat isumaqatigiissut atorunnaarsinneqarsinnaavoq, Aalisarnermut Piniarnermut Nunalerinermullu naalakkersuisuugallartoq Ane Hansen oqarpoq.
Namminersorlutik Oqartussat Arctic Green Food-imik kiffartuussinissamik isumaqatigiissutaa
7 millioner kr-nik naleqartoq ukiormannamut atuuttussaavoq. Kiffartuussinissamik isumaqatigissut siornamut atuuttoq maleruarneqarsimanngippat, kiffartuussinisamik isumaqatigiissut attatiinnarneqassanersoq Ane hansen-imut apeqqutigaarput.
Kiffartuussinisssamut isumaqatigiissut siorna atuuttoq Arctic Green Food peqatigalugu maanna mississoqqissaarneqarpoq, ukiormannalu isumaqatigiissut qanoq ittuussanersoq aamma missorneqarpoq.
Ikamiuni Maniitsumilu aalisartut tunisaminnit Bonus-isisimanngitsut qanittumi tusarliunneqarpoq.
Ikamiuni Maniitsumi allanilu aalisartut bonus-inik tunineqartarnissaat, Arctic Green Food-ip naatsersuutaanni ilanngunneqareernikuupput, taamattumik Ane Hansen-ip naatsorsuutigivaa aalisartut bonus-inik tuninissaanik pisusaaffigigaat.
Aalisanermut Piniarnermut Nunalerinermullu Naalakkersuisuugallartup Ane Hansen-ip ilanngullugu oqaatigaa, aalisartut bonus-inik tunineqarsimannginnerat pillugu atorfilittanik misissuisitsilluni.