Arctic Circle Race 2015 ingerlalluartoq
Aaqqissuussinerup siuartinneqarneratigut nunanit allanit peqataasussat marsip 17-ianit 24-anut Sisimiuniissapput, nunatsinniillu peqataasussat piffissaq pisariaqartitartik naapertorlugu ACR-mut peqataajartussallutik.
Ukiormanna maannammut nunanit 14-init peqataaniarluni nalunaartoqarsimavoq, taakkunannga aqqanillit Tuluit Nunaanneersuullutik. Peqataasussallu amerlanersaat pisarnertut nunatsinneersuussapput.
Tusagassiorfinneersut 20-it Arctic Circle Race malinnaaffigiartorlugu Sisimiunut tikinnissartik aamma nalunaarutigisimavaat.
Atuagassiamit Outdoor Trainingimeersunik peqataasoqassaaq, Scweitzimilu nuna tamakkerlugu tv-qarfik mountainbikemik sikkilertartut marluk nalinginnaasumik peqataasut saniatigut fatbikenik taaneqartartunik sikkilerlutik peqataassapput.
Sakkortuumik timersorneq pillugu aallakaatitassiamik "Boundless"-imik suliarinnittut Canadameersutt USA-meersuullu aamma malinnaajartussapput. Aallakaatitassiaq taanna nunarsuaq tamakkerlugu inoqutigiinnit 100 millionit sinneqartunit isiginnaartartoqarpoq.
Nunatsinnit Sisimiut TV aamma Sisimiut Tusaataat ilaatigut KNR suleqatigalugu malinnaassapput, Malou Medialu Nuummeersoq ACR-imut peqataasut ilaannik aamma malittarisaqassalluni. Kiisalu aamma Greenland Today nunani 30-nit amerlanerusuni 100.000-inik atuartartoqartoq aammalu nittartakkatigut inuit atassuteqaataasigut nunarsuaq tamakkerlugu inunnit 850.000-init malittarineqartoq ACR-imik malinnaassaaq.
Arctic Circle Race 2015-ip ingerlanneqarnerani aamma Danish Adventure Film suleqatigalugu filmertitsilluni festivaleqassaaq, tamannalu kulturikkut illorsuaq Taseralik suleqatigalugu ingerlanneqassalluni.