SIK suliffissaaleqisut amerleriartut pillugit: Ajorluinnarpoq

Apriili sulisunut eqquingaatsiarpoq.

Aprilimimi suliffissarsiorlutik nalunaarsimasut 2.247-upput. Piffissami tassani suliffissiorlutik nalunaarusimasut ukiup siulianut sanilliullugit 209-nik amerlanerullutik. Naatsorsueqqissaartarfiup kisitsisaataani tamanna takuneqarsinnaavoq.

Suliffissaaleqisut amerleriarnersimanerat kingulleq pivoq, juulip qaammataani 2017-mi.

AAMMA ATUARUK Vittus Qujaukitsoq kommunet siunnersuutaat pillugit: Qanoq aningaasalersorneqassappat?

Tamanna SIK-mi siulittaasup Jess G. Berthelsenip nuannaarutiginngilaa.

- Ajorluinnarpoq. Ajoraluartumilli ilimagigereerpara suliffissaaleqisut amerleriassasut, Jess G. Berthelsen oqarpoq.

Suliffissarsiorlutik nalunaarsimasut marsip qaammataanit apriilimut 131-nik amerleriarput, siorna 2019-imi qaammatini pineqartuni 174-inik ikileriarsimallutik.

Illoqarfiit anginerit eqqugaasut

Illoqarfimmi takornariaqarfiunerpaami Ilulilissani suliffissarsiortut amerleriarnersaapput.

Ilulissani apriilimi 174-it suliffissarsiorlutik nalunaarsimapput, siorna 2019-mi apriilimi suliffissarsiortut 78-usimallutik, 100-ngajannik amerleriarlutik.

Illoqarfiit anginerit eqqugaaqqanerpaasut GE-p allattoqarfiani pisortap, Karsten Lyberth-Klausenip tupiginngilaa.

- Takusinnaavarput illoqarfinni annerni suliffissaaleqilertoqarnerpaasoq, tassaniippummi akunnittarfiit takornarialerisullu anginerit. Naak kisitsisini takusinnaanngikkaluarlugu akunnittarfiit nerianiartarfiillu eqqugaanerpaasut ilimagaara, Karsten Lyberth-Klausen oqarpoq.

AAMMA ATUARUK Air Greenland atorfinnik 75-100-nik atorunnaarsitsisoq

Sisimiuni suliffisarsiortut malunnaatilimmik aamma amerleriarput. 304-it suliffissarsiorlutik nalunaarsimapput siorna piffissami tassani 217-it suliffissarsiorsimallutik.

Nuummi, Uummannami Tasiilamilu suliffissarsiorlutik nalunaarsimasut aamma malunnaatilimmik amerleriarsimapput.

Marsip qaammataata qeqqaaniit COVID -19 pissutigalugu killilersuinerit atuutsinneqalerput, naatsorsueqqissaartarfik allappoq.

Ilanngullugulu erseqqissaatigineqarpoq, suliffeqarfinni namminersortuni sulisut akissarsianut taartisiaqartinneqarlutik angerlartitaasimasut suliffissarsiortutut nalunaarsugaanngimmata.