Aqutsiveqarfimmi Sisimiuni assagiarsuttassiissutit ilaneqartut
Assagiartassiissutit 130 tonsinik ilaneqartussanngorlugit naalakkersuisut aalajangerpaat.
Pisassiissutit 130 tonsinik ilaneqarput.
Allattoq Bikki P. Kleist
oktobarip 10-at 2019 06:17
Sisimiuni assagiartassiissutit 130 tonsinik ilaneqassasut, Naalakkersuisut ataasinngornermi oktobarip ulluisa 7-ianni aalajangerpaat.
Aalisarnermut piniarnermullu naalakkersuisoqarfik taama nalunaaruteqarpoq.
Pisassiissutigineqartut assagiarsunniarfinnut aalajangersimasunut siammarlugit agguataarneqarput.
Aqutsiveqarfimmi Sisimiuni ukioq manna 500 tonsit pisassiissutigineqarput.
Assagiartassiissutigineqartut aggustip 18-ianni 2019-imi tamakkerneqarsimalereerput.
Qalerallittassiissutit septembarimi qilalukkallu sapaatit akunnerata siuliani ilaqqinneqarput, assagiartassiissutillu maanna pingajuattut ilaneqarlutik.
