Aqqusinermi tarrisimanngitsumi pinngitsaaliilluni atornerluisoqarnerata kingorna: Innuttaasut suli toqqissisimasinnaapput

Niviarsiaraq 18-it inorlugit ukiulik Nuummi aqqusinermi tarrisimanngimanngitsumi sapaatip akunnerata naanerani ullukkut pinngitsaalineqarluni atornerlunneqarpoq.

Pinerluuteqartoq tigusarineqartoq, politiinspektørip, Kathrine Sandgrenip oqaatigaa, taassumalu innuttaasut naak pisoqarsimagaluartoq illoqarfiup aqquserngani toqqissisimasinnaanerarpai.

- Naak tamanna sapaatip akunnerata naanerani pigaluartoq innuttaasut aqqusinermi toqqissisimallutik  angallassinnaapput, Kathrine Sandgreen oqarpoq.

- Nakuuserneq aamma pinngitsaaliilluni atornerluineq assigisaalu pillugit kisitsisaatigut naapertorlugit pisut amerlanerpaasartut pinerlineqartup pinerluuteqartullu akornanni attaveqatigiittoqartartoq takusinnaavagut.

Sapaatip akunnerata naanerani pisumi pinerluuteqartup pinerlineqartullu akornanni atassuteqartoqarnersoq, Kathrine Sandgrenip misissueqqissaartoqarnera pissutigalugu oqaaseqarfigisinnaanngilaa.

Toqqissisimasinnaaneq allanngunngitsoq

Pisoq inuit aqqusinermiinnerisa nalaanni ualikkut pimmat suliamut qanoq takussutissiiva?

- Pisimasoq pillugu maannakkut misissuisoqarmat oqaaseqarfigisinnaanngilara. 

Taassumali toqqissisimasinnaaneq allannguuteqanngitsoq inuillu illoqarfiit pingaarnersaanni nunatsinnilu sumiiffinni allani toqqissisimallutik suli  angallassinnaasut erseqqissaatigaa.

- Illoqarfiit allat oqaatigineqasappata, erseqqissaassutigiinnassavara taakkunani innuttaasut aamma aarleqqutissaqanngimmata, toqqissillutik angalasinnaallutik, Kathrine Sandgren oqarpoq.

Sapaatip akunnerata naanerani pinerluuteqartoq ippassaq sassartinneqarpoq, politiillu suliamik misissueqqissaarneranni ulluni 28-ni tigummigallarneqartussanngortinneqarluni.