Aqqaluaq B. Egede aalisarnermut piniarnermullu naalakkersuisuujunnaarnerminut: Soorunami oqimaappoq
Naalakkersuisoqatigiit nutaat Naalakkersuisuni ilaasortat nutaat.
Inuit Ataqatigiit aalisarnermut piniarnermullu naalakkersuisoqarfik naalakkeruisooqatigilikkaminnut pilliutigaat.
Siumup aalisarnermut piniarnermullu naalakkersuisoqarfik akisussaaffigeqqilerpaa, Aqqaluaq B. Egedelu aatsitassanut inatsisinullu atuutsitsinermut naalakkersuisunngorluni.
Taanna ugguaraluarluni susassaqarfimmi allami soqutigisaminiilerami nuannaarpoq.
Naalakkersuisooqatigiilersut pillugit
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq. Naleraq ataasinngormat peersinneqarpoq.
Maanna Siumut sisamanik naalakkersuisuutitaqalerpoq Kim Kielsenilu Inatsisartuni siulittaasunngorluni.
AAMMA ATUARUK Aki pillugu isumaqatigiinnginneq: Nipisanniarneq suli aallartinngilaq
- Inuit Ataqatigiit siuliani naalakkersuisuutitaqaramik arfineq-marlunnik, taava ikileriaatitta saniatigut suleqatigut aamma amerligamik. Naaperiarfigisinnaasagut taakkuusimapput, Aqqaluaq B. Egede oqarpoq.
Aalisarnermut inatsisissap kinguarteqattaarneqartup suliarinerani aalisarnermut piniarnermullu naalakkersuisoq allanngoqqippoq. Tassa Karl Tobiassen (S) Qaarsunneersoq naalakkersuisuulerpoq.
Aalisarnermut inatsisissaq iperaruminaattoq
Inatsisissaq ukiaru piareerneqartussaagaluartoq Naalakkersuisut aappaagu upernaamut kinguartinnikuuaat.
AAMMA ATUARUK Aqqaluaq B. Egede isornartorsiuisoqarnera pillugu: Oqallittoqalernera iluarisimaarpara
Suliallu ingerlasup iperartariaqalernera uggornartoq Aqqaluaq B. Egede oqarpoq.
- Soorunami oqimaappoq, aamma suliat tiguartisimaffigeqqissaarlugit anersaaqarfigalugillu suliniarsimavunga aalisartut ingerlatseqatigiiffiillu peqatigalugit.
- Kommunit aamma nunap immikkoortuini assigiinngisitaartuni aalisartut atugaat tullinnguukkaluarpagut. Suliassat tassunga killittut soorunami oqimaalaarpoq iperarnera.
Naalakkersuisoqarfiit paarlaanneranni Aqqaluaq B. Egede (IA), Múte B. Egede (IA) Karl Tobiassenilu (S) aalisarnermut piniarnermullu naalakkersuisoqarfimmi. Assi: Ane-Marie Petersen/KNR.
Naalakkersuisumut sianiinnarluni aalisarnermut akuersissutisisarneq ukiut 20-t kingulliit nalinginnaasuusimasoq Aqqaluaq B. Egede Ilulissani aalisarnermut isumasioqatigiissitsinermini oqarpoq.
Taama oqarnera isornartorsiorneqangaatsiarpoq, illuatungiliuttuniillu Demokraatinit ukiuni aalisarnermut kingullerni 20-ni naalakkersuisuusimasunut utoqqatseqquneqarluni.
Aalisarnermut susassaqarfimmiit aatsitassanut
Aqqaluaq B. Egede Narsarmiuuvoq, uranimillu piiaanissamut akerliusuulluni.
Aatsitassarsiornialersaarnerlu politikerinngornerminut pissutaaqataasoq oqarpoq.
Taassuma aalisarnermut piniarnermullu naalakkersuisuujunnaarnini uggorigaluarlugu aatsitassanut naalakkersuisunngornini nuannaarutigaa.
- Taamaammat suliassaqarfik aamma soqutigisara illuatungaani pissarsiarivara, taanna oqarpoq.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Uranimut apeqqut Siumup IA-llu ukiorpassuarni avissaartuuffigaat. Uranimullu politikki Inatsisartunut kingullermik qinersinerup inerneranut sunniuteqartorujussuuvoq.
Taakkulu partiit marluk isumaqatigiiffigisinnaasatik ukkatarinerulerniaraat Aqqaluaq B. Egede oqarpoq.
- Nunatta ukiorpanni nikeriarsinnaannginneranut isumaqatigiinngiffitta qaqittaqattaarneri patsisaavoq. Taamaammat ataatsimoorfigineqarsinnaasut taakku nassaarineqartariaqarput aningaasarsiornerlu nutaaq pilersillugu, taanna oqarpoq.