Aqqalu Jerimiassen amerlanerussuteqartunit tatigineqanngitsoq
Aqqalu Jerimiassenip silap pissusaata allanngoriartornera inunnit piliaasorinagu oqarnera soqutigisuusaarneqarsinnaanngitsoq, Inuit Ataqatigiit politikkikkut oqaaseqartartuat Aqqaluaq B. Egede isumaqarpoq.
- Una imaannaanngitsorujussuuvoq, Naalakkersuisut siulittaasuata suleqataasalu isummerfigisariaqagaat, Aqqaluaq B. Egede oqarpoq.
Aqqalu Jerimiassen (A) silap pissusaata allanngoriartornera inunnit piliaasorinagu Sermitsiaq.AG-mut sapaatit akunnerisa siuliani oqarami isornartorsiorneqartupilussuuvoq.
AAMMA ATUARUK Demokraatit: Nikkulaat Jeremiassen Aqqalu Jerimiassenilu sukkanerpaamik tunuartariaqarput
Taamalu oqarmat partiimit Naalakkersuisunik ikorfartuisumit Demokraatinit tatigineqarunnaarpoq.
- Uani oqariartuutigineqarsimapput, silaannaap allanngoriartornerani pissutsit aammalu tassunga tunuliaqutaasut. Taamatut naalakkersuisoqarfimmik pingaarutilimmik tigummiaqarluni naalakkersuisuunerup akisussaanera tassani paatsoorujussuarneqarsimasoq isumaqarpunga, Demokraatit siulittaasuata tullia, Randi Vestergaard Evaldsen, Aqqalu Jerimiassenimik tunuaqqusinertik pillugu oqarpoq.
Aamma Partii Naleraq tatiginninngippat amerlanerussuteqartut Aqqalu Jerimiassenimut akerliussapput.
Partiimit oqaaseqartitsiniarnerput suli iluatsinngilarput, partiimiilli Inatsisartunut ilaasortat tusagassiuutinut tallimanngormat ima nalunaaruteqarpoq.
- Inuit Ataqatigiit aamma Demokraatit oqaatiginerattuut Partii Naleraq sinnerlugu Naalakkersuisoq Aqqalu Jerimiassen tatiginngilarput.
AAMMA ATUARUK Aqqalu Jerimiassen isornartorsiorneqartuarsinnartoq
Suliaq Siumumit malinnaavigineqartoq Siumup Inatsisartuni gruppiata siulittaasua Karl-Kristian Kruse oqarpoq.
Aqqalu Jerimiassenilli oqaasiisa aalassaatigineqarnerat tupinnanngitsoq, taanna oqarpoq.
- Inatsisartut ataatsimiinneranni arlaannik pisoqarsinnaappat uanga tupinnartutut isiginavianngilara, Karl-Kristian Kruse oqarpoq.
AAMMA ATUARUK Nunarsuup kissatsikkiartorneranik naalakkersuisup qularisaqarnera Aajap isornartorsioraa
