Aqagu unammeqqissasoq: Ukaleq Slettemark OL-imi aappassaanik unammilersoq
OL-ertoqarneranik nunatsinniillu peqataasutuamik malinnaaneq aqagu ullaakkut itiaarujussuassaatit.
Sisoraaserluni ooqattaasartoq, Ukaleq Slettemark nunatta nalunaaqutaa naapertorlugu 06.17 unammeqataaqqissaaq. Taanna ataasinngormat kingullermik unammivoq.
20-nik ukiulik, sisoraaserluni ooqattaasartoq 15 kilometerimut unammeqataavoq, tassanilu pitsaanerpaat 60-it akornanniinnissani anguniagaraa. Ilisimaneqalereersutullu tamanna iluatsippaa. 20-nillu ooqattaanermi 20-t eqqorlugit apuuffissaminut minutsit 50-it sekundillu sisamat atorlugit apuuppoq. Taamaalilluni unammisuni 53-inngorluni.
Ooqattanermi sisoraaserluni ooqattaasunit marluinnaat 20-t tamakkerlugit eqqorpaat, Ukaleq Slettemarkilu taakkununnga ilaavoq.
Aqagu ullaakkut sukkaniuffissami naannerusumi peqataaqqissaaq.
Taanna 34-mik normoqarluni 7,5 kilometerimut sukkaniunnermut peqataassaaq.
Periarfissagissaartoq
Tassangalu ingerlaqqinnissamut pikkorinnerpaat 60-it akornanneeqqissaaq. Unamminermi anngutissaguni sapaatiuppat nunatta nalunaaqutaa naapertorlugu ullaakkut arfinernut ooqattaaserluni unammeqataaqqissaaq. Tassanilu 10 kilometerimut malersuunnermut unammisoqassalluni.
Tamanna OL-imut peqataanerani annerpaassasoq, KNR-ip timersornermut oqaaseqartartua, Noah Mølgaard taama naliliivoq.
AAMMA ATUARUK Ukaleq uniunngivinneq naammagisimaarlugu: Ooqattaasarneq kingulleq nalunarnersaavoq
- 10 kilometerimut malersuunnissamut anngunnissamut periarfissagissaarpoq.
- OL-ertoqannginnerani World Cupimi sukkaniunnermi 62-nngorpoq. Unammeqataasunik Ukaleq Slettemarkimit angusarissaarnerusoqarpoq, taakkuli OL-imut peqatanngillat. Tamanna malersuunnissamut anngunnissaanut periarfissagissaarnerutitsivoq.
Ukaleq Slettemark sapaatiuppat ullaakkut malersuunnissamut anngutissaguni tamanna OL-imut peqataarngaarnerani unammeqataanerni kingulliussaaq. Sisoraaserlunimi ooqattaasartoq inuusuttut nunarsuarmi pissartanngorniunneranni peqataasussaavoq, taamaammat Beijingimi februaarip ulluisa 19-ianni sukkaniunnermut peqataanissamut allatsissimanngilaq.
Ataataminit angusarissaarnerisoq
Ukaleq Slettemarkip saqqarmiunnannissani nammineq naatsorsuutiginngilaa. Taassumali OL-imi peqataanermini ataataminit Canadami Vancouverimi 2010-mi OL-imut peqataasumit pitsaanerusumik angusaqarnissani anguniagaraa. Taanna isorakitsumi sukkaniunnermi 86-inngornikuuvoq.
Anguniagarlu taanna anguneqareersoq, Noah Mølgaard naliliivoq.
- Ataataminit pitsaanerusumik angusaqareerpoq. Taanna Vancouverimi 2010-mi OL-ertoqarneranut peqataagani unioqattaarpoq, Noah Mølgaard oqarpoq.
AAMMA ATUARUK OL-imut peqataasimasut: Ukallip uummammi tillerulunnissaa ilimagissavaa
Ukaleq Slettemarkip unammeqataaffigisai tamarmik TV2-p suleqatigineratigut KNR TV-kkut toqqannartumik aallakaatinneqarput.
Sisoraaserluni ooqattaanermi unamminerit februaarip ulluisa 19-ianni naammassissapput.
Ukaleq Slettemark danskit erfalasuanik erfalasoqarluni aamma unammeqataavoq, tamanna Olympiske Komitép IOC-ip nunatta OL-imut tunngatillugu nunatut naminiilivissimasutut akuerinninnginneranik pissuteqarpoq.
Ukaleq Slettemark inuusuttut Slovakiami 2019-imi nunarsuarmi pissartanngorniunneranni 10 kilometerimut sukkaniunnermi pissartanngorpoq. Taannalu norgemiut inuusuttut nunanut allanut unammisartut peqatigalugit ulluinnarni sungiusartarluni Norgemi najugaqarpoq.