Ukaleq uniunngivinneq naammagisimaarlugu: Ooqattaasarneq kingulleq nalunarnersaavoq

Kisitsit 20 ullumikkut 20-nik ukiullip Ukaleq Slettemarkip ilisarnaatigilluarpaa.

Tassami 20-riarluni ooqattaasarami 20-riarluni eqquilluni OL-mi unammeqataarngaarnini naammassivaa.

Ukaleq Slettemark aallartunit 87-sunit normu 53-tut inissilluni OL-mi 15 kilometerimut unammeqataavoq.

AAMMA ATUARUK Ukaleq Slettemark OL-imi peqataarngaarnermini angusarissaartoq

Ooqattaasataasuni marluinnat uniunngivillutik 20-riarlutik ooqattaasarmata taamatut angusaqartup Ukaleq Slettemark aapparivaa.

- Ooqattaasarnera naammagisimaarluarpara. Iluatsilluarpara. Unammisartuuninni siornatigut ataasiaannarlunga 20-riarlunga ooqattaasarninni 20-riarlunga eqquinikuuvunga, Ukaleq Slettemark nuannaaqaluni KNR-mut oqaluttuarpoq.

- Niaqqunni 100-riarlugu takorloortarpara pissutsit assigiinngitsut soorlu anori unammeqataasullu allat qanoq periuseqarfigissallugit, oqarpoq.

Unammiffigisaat 1.700 meteri angungajallugu qatsissusilimmiikkami silaannakippoq. Tamannarpiarlumi aamma pissutaaqataavoq uniunngivikkaluarluni normu 53-tut inissinneranut.

Ukaleq Slettemark ajugaasumit Tysklandimeersumit Denise Herrmannimit minutsit arfinillit sinnerlugit kigaanneruvoq.

- Taama qatsitsigisumiinnissamut sungiusarsimanera amigarpoq unammeqatigisakkalu tupinnaannartumik kakkapput. Misilittagakikkama sakkortuallaamik aallarpunga, Ukaleq Slettemark oqarpoq.

Timip qasunerani ukkissilluarneq

Taamaattumik kalaallimut tassunga sisorarnikkut siuariartupiloortumut timip qasunerani uniornaversaarnissaq assut piumaffiginarsimavoq.

- Assut nalunarpoq. Amerlasuut tamanna unamminartittarpaat aamma uanga unamminartippara. Taama takitigisumut killinnermi seqqorneq kingulleq naammassilluarniagassaavoq. Tamanna nalunarnersaavoq. Tamannalu ullumi naammassilluarakku angusaavoq pitsaasoq, Ukaleq Slettemark oqarpoq.

Unammineq tulleq tassaavoq tallimanngorpat ullaakkut 7,5 kilometerimut naatsumut unammineq tassanilu siulliit 60t sapaatiuppat 10 kilometerimut malersuunnermut anngutissaput.

- Unammiffigisatta qatsitsissusaani aatsaat aappassaa unammivunga. Taamaattumik iluarpoq unammineq ullumikkut siulliummat. Maanna tamanna naatsumut unamminermut nassarsinnaavara neriuppungalu tassani pitsaanerulaarsinnaassallunga, Ukaleq Slettemark oqarpoq.

7,5 kilometerimut naatsumut unammineq KNR-TV-mi tallimanngornermi ullaakkut aallakaatinneqassaaq.