Anthon Frederiksen: Minnerpaamik marluk qinigaassapput
![](/sites/default/files/styles/image_934x467/public/article_images/aantuut_630_2.jpg?itok=3O8ho7ap)
Partiimi Inatsisartuni ilaasortakinnerpaamit aamma Naalakkersuisoqatigiinni peqataasumit, Kattusseqatigiit Partiiannit partiip siulittaasua Anthon Frederiksen qinigassanngorteqqissaaq.
Qinersisartunik isumasiunerup kingulliup takutikkaluarpaa Kattusseqatigiit Partiiat isinngitsoortussaasoq, tamannali aporfiginagu Anthon Frederiksen qinigassanngorteqqinniarpoq.
- Partiitsinnut tunngatillugu tamanna takornartaanngilaq. 1995-imi siullermik qinersinissamut sassarnitsinniit, qinersilernerni isinngitsoortussatut ilimagineqartarpugut. Kisianni politikikkut suliniarnitsinni sukataartarnitsinnilu, pingaartumik ukiuni kingullerni, angusagut ersarissut takussutissaqalereersullu inuiaqatigiinnit paasineqarluartarput. Taamaattumik uanga nammineerlunga qularinngilara martsip aqqaneq aappaanni qinersinermi minnerpaamik marlunnik Inatsisartuni issiatitaqalernissarput, Kattusseqatigiit siulittaasuat Nunamullu namminermut Naalakkersuisuusoq, Anthon Fredriksen oqarpoq.
Kattusseqatigiit Partiiat Inatsisartuni ataatsimik maanna ilaasortaatitaqarpoq, tassalu Knud Fleischer issiatitaalluni. Taannali maanna partiimi tunuarluni nalunaaruteqarpoq.