Anngiortumik eqqusseriartumik Kangerlussuup mittarfiani tigusarinnittoqartoq
Angut 30-nik ukiulik hashimik qanoq annertutigineranik ilisimaneqanngitsunik Nuummut eqqusseriaraluartoq mittarfimmi akiitsuuserisut unitsinneqarnermi kingorna Kangerlussuup mittarfiani ippassaq ullaap tungaani tigusarineqarpoq.
Politiit aggersarneqarput angullu nalunaaqutaq 11:30 tigusarineqarluni.
Taanna ikiaroornartunik anngiortumik eqqusseriartutut pasineqarpoq.
Angut politiinit nakkutigineqareersuunikuusimanersoq Kalaallit Nunaanni Politiit paasissutissiissutigisinnaanngilaat.
Pinerluttukinnerusoq ikiaroornartoqarnerusorli
Siorna 2021-mit pinerluttoqannginnerusimasoq KNR-ip siusinnerusukkut allaaseraa.
Tamannali ikiaroornartumik ilaqartumik inatsisinik unioqqutitsinernut ilaanngilaq.
Politiit ukiumoortumik naatsorsuinerat naapertorlugu 2022-mi inatsisinik unioqqutitsinerit ikiaroornartumut tunngassuteqartut – matumani hashi 129,687 kiilu nalunaarsorneqarsimasut 584-iupput.
Kalaallit Nunaanni Politiit oqarnerat naapertorlugu taakku ukiuni 20-ni nalunaarsorneqarsimasuni amerlanerpaapput.
Haship arsaarinnissutigineqartup annertusiartornera pissutaanersoq paasiuminaatsoq, Kalaallit Nunaanni Politiit pisortaata, Bjørn Tegner Bayip KNR-imut oqaatigaa:
- Ikiaroornartoq arsaarinnissutiginngitsoortagarput qanoq angitiginersoq naluara. Akitsuuserisullu ikiaroornartumik nunatsinnut anngiortumik eqqusseriaraluartunik eqaannerusumik nakkutiginneriaaseqalernitsinnik peqquteqarsoraara, taanna oqarpoq.
Angut 30-nik ukiulik Nuummi marlunngornermi ullaap tungaani iperagaasoq, Kalaallit Nunaanni Politiit KNR-imut paasissutissiissutigaat
