Hashimik nunatsinni arsaarinninneroqisut

Kalaallit Nunaanni Politiit hashi 129,7 kiilu siorna arsaarinnissutigaat.

Tassa hashi 2021-mi arsaarinnissutigisimasaaninngarnit pingajorarterutaanik, 33 procentimik, angineruvoq.

Ikiaroornartumik nunatsinnut anngiortumik 2022-mi eqqusseriaraluartutut tigusat 2021-mi tigusaninngarnit pingasoriaammik amerlanerupput. Taakkunannga amerlanerpaartaat hashimik nunatsinnut anngiortumik eqqusseriaraluartuupput.

Corona

Hashimik nunatsinni arsaarinninneroqisalernertik ikiaroornartumillu anngiortumik eqqusseriaraluartutut tigusat amerliartuinnarnerat sumik peqquteqarpiarnersoq eqqoriaruminaattoq, Kalaallit Nunaanni Politiit pisortaat Bjørn Tegner Bay oqarpoq.

 - Ikiaroornartoq arsaarinnissuteqanngitsoortagarput qanoq angitiginersoq naluara. Akitsuuserisullu ikiaroornartumik nunatsinnut anngiortumik eqqusseriaraluartunik eqaannerusumik nakkutiginneriaaseqalernitsinnik peqquteqarsoraara, taanna oqarpoq.

AAMMA ATUARUK Hashimik atornerluisutut katsorsartikkusuttut 65 procentimik amerlanerusut

Ikiaroornartumik nunatsinni pinerluuteqartut amerliartuinnarnerat sumik peqquteqarpiarnersoq, politiit pisortaata oqaatigisinnaanngilaa. Tamannali coronap tuniluunnerani killilersuisoqarneranik peqquteqarsimasinnaasoq, taanna oqarpoq.

Ikiaroornartumimmi nunatsinni pinerluttut 2020-p kingornali amerliartuinnarput. Hashi 26,8 kiilu nunatsinni 2020-mi arsaarinnissutaavoq. 2021-imi arsaarinnissutigineqartup taamaallaat pingajorarterutigaa.

- Nunatta ilarujussuani timmisartuussinernik 2020-mi 2021-imilu matusinerit peqqutaaqataasimasinnaapput, Bjørn Tegner Bay oqarpoq.

Pingasut ikiaroornartumik iioraasimanermik siorna toqquteqartut

Angutit pingasut ikiaroornartumik iioraasimanertik siorna toqqutigaat.

Taakkunannga ataaseq angutaavoq 33-nik ukiulik. Angut taanna timmisartumi Københavnimiit Kangerlussualiartumi ilaatilluni toquvoq.

Angutip taassuma ikiaroornartoq iiorarsimasaa poortornerlutaasimammat timaanut arruussimasoq, politiit taamanikkut ilisimatitsipput.

Ikiaroornartoq angisooq aqajarormioqartoq, angutip taassuma timaata misissornerani paasineqarpoq.

Angut alla tamatuma kinguninnguagut, 2022-mi aggustip arfineq-aappaanni, toquvoq, angullu taanna ikiaroornartumik aamma poortornerlutamik iioraasimavoq. Naamigut anniarujussuarmat Dronning Ingridip Napparsimmavissualiaatilertorneqartilluni uummamminik unittooreerluni toquvoq.

AAMMA ATUARUK Hashi 12 millionit koruuninik nalilik RAL-ip umiarsuaani nassaarineqartoq

Angutip taassuma toqqutaa paasiniarlugu pilallugu misissorneqarpoq. Hashimik aqajarormioqartoq inalugarmioqartorlu, nakorsat timaa misissoramikku paasivaat.

Angut aamma alla 53-inik ukiulik Qaqortumi oktobarip 20-ani aamma toquvoq. 

Angut taanna hashimik poortukkamik iioraasimavoq, iiorarsimasaalu erlaviani katersuuttoorsimammata timimigullu aseruuttoorluni toquvoq.

Politiit oqarnerat naapertorlugu ikiaroornartumik iioraasimasutut 2022-mi tigusat 62-iupput. Politiilli kisitsisaataat suliani taamaallaat kisitsinerneersuummata, taakku nalunaarsorneqarsimanngitsoqarataannaapput.

Ikiaroornartumik iioraanermik 2023-mi toqquteqartoqanngilaq, kisianni angut hashimik mikisuaqqanik 100-nngorlugu poortukkamik iioraasimasoq Kangerlussuarmi januaarip 30-ani tigusarineqarpoq.

Arnaq 30-nik ukiulik hashimik kiilumik iioraasimasoq Kangerlussuarmi sapaatit akunnerata siuliani aamma tigusarineqarpoq.