Unnerluutigisap isiginnittullu nassuiaataat assigiinngitsut

Kilisaammi inuttaq alla Reykjavikkimi eqqartuussivimmi ataasinngornermi nassuiaavoq. 

Unnerluutigineqartup inuttaq taanna ullumi tikkuarpaa oqaluttuarluni, inuttaq taanna alla Birna ilaasoralugu biilinik ingerlasoq ilaasorinagulu utertoq.

Inuttalli taassuma unnerluutigineqartup nassuiaatai ilumuunnginnerarpai. Aalakoorpallaarluni biilinillu ingerlatsisinnaanermut uppernarsaateqarani taavalu aamma aalakooqigami biilersinnaanngivilluni, inuttaq taanna nassuiaavoq:

AAMMA ATUARUK Unnerluutigisap inuttaq alla tikkuaraa

AAMMA ATUARUK Unnerluutigineqartoq Birna pillugu ullumi eqqartuussaassaaq

- Biilersimanissara qularaara. Biilini sinilerama, oqaloqatigisimanissaa nalornisigaara. Tamakkiisumik eqqaamasaqarfiginngilara. Taama aalakoortigalunga biilersimaguma, ajutoorsimassagaluarpunga, inuttaq taanna alla eqqartuussivimmi vísir.is naapertorlugu nassuiaavoq.

Eqqartuussisup inuttaq taanna Polar Nanormut sapaammi ullaakkut ikilernermini allamik naapitaqarsimanersoq aperaa. Aalakoorpallaarsimaninilu pissutigalugu eqqaamasaqarsimannginnerarluni apeqqut akisinnaannginerarpaa.

Inuttarli arnamut nunatsinniittumut sinilluaqqusiniarluni januaarip 14-iani ullaakkut sianersimavoq, arnallu taassuma eqqartuussivimmut ullumi nassuiaanermini oqaatigaa, angut malunnartumik aalakoorpasittoq.

Taassuma saniatigut paasiniaasartut pisortaat biilinik aappaluttunik misissueqqissaarsimanertik pillugu oqaluttuartinneqarpoq.

Biilini aak

Misissuisartut biilini misissueqqissaarnerminni aammik ilaasut issiavianni, seqinermut alanngittaammi, sukkassutsimut nalunaaquttat allallu ikkussorfianni biilillu matuani nassaarsimapput.

- Aporaanneq biilit iluani aallartissimasoq ersarippoq, paasiniaasartut pisortaat, Leifur Halldórsson oqarpoq.

Pisortaq nangilluni oqaluttuarpoq Birnap DNA-mik ilisarnaatai unnerluutigineqartup atisaani nassaassaasut. 

Aamma eqqartuussivimmi ataasinngornermi oqaatigineqarpoq unnerluutigineqartup DNA-mik ilisarnaatai Birnap singiini nassaarineqartut.

Birnap timaaneersunik inuttami allami misissuisartut nassaarsimanngitsut, paasiniaasartut pisortaata eqqartuussivimmi aamma erseqqissarpaa. 

Inuttaq taanna qaammat sinnerlugu tigummigallagaareerluni marsimi iperagaavoq pasilliutillu tunuartinneqarput.