Aningaasarliorneq angalajunnaarutaanngilaq
Kommune Kujalleq aningaasarlioraluaqisoq naammagineqanngilaq Prins Christiaap pissaasa nassiunnissaat. Taarsiullugu kommunep aallartippai 2. viceborgmester aamma pisortap tullia Frank Hedegaard tunissutissanik tunniussisussatut.
Kommune Kujalleq aalajangernikuugaluarpoq pisariaqanngitsumik angalanerit tamarmik unitsinneqassasut. Taamaattoq tassa borgmesterip tullersortaata tullia tunissutissanik tunniussinissaq kisiat siunertaralugu Danmarkiliartinneqarpoq ullullu tallimat angalanermut atorlugit.
- Taamaasiornikkut kommune pitsaasumik nittarsaanneqarpoq. Taamaasiornissaq aningaasarnermut ataatsimiititaliap ukiup aappaata affap matuma siorna aalajangiuppaa, taamaattumik taamaasiorneq isornartoqanngilaq Kommune Kujallermi borgmesteri Simon Simonsen KNR-imut taama oqarpoq.
Oqaluttuarli allamik aamma ilaqarujoq. Prinsip annoraartaava kamisartaavilu Kommune Kujallermit tunissutaasut ullumikkut atualeqqaarnermi atorneqanngillat angajoqqaani ilagalugit Hellerupimi Tranegaardsskole-mi atualermat. Prins Christian meeqqat allat assigalugit naatsunik qarleqarpoq ilulleqarluni tujuuloqarlunilu.