Aningaasaqarnerup ajalusoornissaa pinngitsoortippaat

Qaasuitsup kommuniani missingersuutit kingulliit takutippaat ukiup naanerani 25,3 millioner koruuninik sinneqartooruteqarnissaq uniorlugu sinneqartoorutit 1,2 millioner koruuniinnaasussanngortut. Tamatut ingerlasoqaannassappat kommunip aningaasaqarniarnera ilungersunartorujussuarmut inissittussaavoq.

- Tamatuma kommunip aningaasaqarniarnera ilungersunartorujussuarmut inissittussaavaa kommunillu aningaasartuutini akilersinnaajunnaassavai, Qaasuitsup kommunalbestyrelsiata ippassaani ataatsimiissutaani kommuni taama allappoq.

Kommunalbestyrelselli aningaasaqarniarnerup ajalusuulernera pinngitsoortippaa. Aningaasaliissutit atorneqanngitsoortut kontonut allanut nussornerisigut sinneqartoorutit pilersaarutaasutut pisussanngorlugit inissinneqarput.

- Missingersuutit uniorlugit 1,2 millioner koruuniinnarnik sinneqartoortussanngoraluarpugut suliffissaaleqinerujussuaq pissutigalugu, borgmester Jess Svane KNR-imut nassuiaavoq.

- Sanaartornerup unittoorsimanera aammalu ukiuunerani aalisarnerup unikaallannera pissutaallutik isumaginninnermut aningaasartuutit ilimagisamit annertunerusimapput, Jess Svane oqarpoq.

Kontonulli allanut junimi nussuineq suliffissaaleqinermik nungutitsisinnaanngilaq. Taamaammat Qaasuitsup kommunia aamma Namminersorlutik Oqartussat suliffissaaleqinerup akiorniarnissaanut aningaasaleeqatigiinniarlutik isumaqatigiipput. Suliffissaaleqisut assersuutigalugu pikkorissarnerit aqqutigalugit sammisaqartinnissaannut kommuni 4 millioner koruuninik Namminersorlutillu Oqartussat 11 millioner koruuninik aningaasaliipput.

Kommunimissaaq neriulluarfigineqarpoq 2013-mi uuliasiornerup aallarteqqinnissaa.

- Siorna misileraalluni qillerinerit pitsaasumik misilittagaqarfigaagut. Maanna kommuni namminersorlutillu suliffeqarfiutillit piareersarluarput uuliasiornermi aappaagu pitsaanerpaamik aningaasarsiornissaq anguniarlugu, Jess Svane oqarpoq.