Aningaasaqarnermut politikki suli ersernerluppoq

- Taamatut misigisimanngilanga. Aamma qineqqusaarnitsinni pissutsit assigiinngitsorpassuit allatut iliuuseqarfiginiarlugit takorluukkavut amerlapput. Aamma soorunami takorluugaqarpugut anguniakkatta angunissaanut suna aqqutigissaneripput. Maannakkut siumugaaq oqaatigisinnaanngilara ukiuni sisamani tulliuttuni anguniakkatta qanoq tulleriinnilerlugit timitalersornissaat pissanersoq. Kisianni aningaasanut inatsisissap ilusilersornerani susassaqartut assigiinngitsut, minnerunngitsumillu suleqatigisavut peqatigalugit, tulleriinnilersuinissarput suliaralugu tassa massakkut aallartipparput, Vittus Qujaukitsoq oqarpoq.

Aningaasaqarnermut Naalakkersuisuusimasoq, Maliina Abelsen, sukannersumik aningaasaqarnermut aqutsisimavoq, aqutsinermut amigartooruteqartitsinaveersaarsimalluni, ilaatigullu Siumukkut Naalakkersuisuuteqarnerisa nalaanni amigartoorutaasimasut aaqqiivigisimallugit. Vittus Qujaukitsulli oqaatigisinnaanngilaa Nunarput amigartooruteqarluni ingerlaqqilissanersoq, taamaattoqassappalli nassuerutigaa aatsaat siullermeerluni taamaattoqassanngitsoq:

- Taamaattoqassangaluarpat siullermeernavianngilaq amigartooruteqarluni ingerlasoqarnissaa. Kisianni oqaatigisinnaanngilara missingersuutitsinni amigartooruteqassanerluta. Kisiannili siunnerfipput imaappoq aningaasartuutit isertitallu sapinngisamik tunngaviatigut oqimaaqatigiisinniarsaralugit ingerlasussaangatta uagutsinnut unamminartuusussaavoq soorunami aningaasartuuterpassuit matussuserniarlugit isaatitsinissatsinnut periarfissanik nutaanik ammaassiniarnissarput.Taamaattumik soorunami uagutsinnut aamma pisussaaffiliisorujussuuvoq aningaasanik isertitsissutaasinnaasunik periarfissanik nassaarnissarput, Vittus Qujaukitsoq oqarpoq..

Taassuma oqaatigisinnaangikkallarpaa aningaasaqarnikkut allannguutit suut inuiaqatigiinnut ukiuni tulliuttuni sisamani atuutilissanersut:

- Aningaasanut Inatsissamut siunnersuutip aasap ingerlanerani, ukiarpallaalinnginnerani saqqummiunneqarnissaanut sulinissatsinnut qaammatialuit piffissaqarpugut. Taamaattumik isumaqatigiinniarnerni inuiaqatigiinni eqimattat qanoq iliuuseqarfiginissaannut qanoq iliuuseqarfiginissaannut taakkartuillunga oqaaseqarsinnaanngilanga, kisianni soorunami takorluugaqarpugut, Vittus Qujaukitsoq oqarpoq.

Aningaasanut Inatsisissatut siunnersuut aggustip arfineq pingajuani tamanut saqqummiunneqassaaq.