Politikki

2017-imut aningaasanut inatsit Aningaasaqarnermut naalakkersuisup Inatsisartut eqqissisarai

Naalakkersuisut pisortat aningaasaataasa amigartooruteqarfiunissaat pillugu Inatsisartunik eqqissisaapput - amigartoorutissat amerlanngillat aamma nunatta karsia aningaasaateqarluarpoq, aningaasaqarnermut naalakkersuisoq Aqqaluaq B. Egede taama oqarpoq.

Allattoq Thomas Munk Veirum

novembarip 21-at 2016 06:03

Nutserisoq Simon Uldum -

Aningaasanut inatsimmi sapaatit-akunnerata naanerani isumaqatigiissutigineqartumi pisortat aningaasaataasa ukiut sisamat ingerlanerini 145 millionit koruuninik amigartooruteqarfiunissaat siunniunneqarpoq, tamannalu Inatsisartut aningaasaqarnermut akileraartarnermullu ataatsimiititaliaannit ernumanartoqartinneqarpoq:

- Ataatsimiititaliaq isumaqarpoq annertuumik amigartooruteqarneq qinigaaffimmi matumani taamaallaat pinnani aammali qinigaaffimmi tullermi aggersumi aningaasaqarnikkut siunissami anguniakkanut annertuumik unammillerfiusussaassasoq, ataatsimiititaliaq aningaasanut inatsisissap ullumikkut ataasinngornermi pingajussaaneerneqarneranut isumaliuutissiissutimini taama allappoq.

Aamma atuaruk 2017-imut aningaasanut inatsit Naalakkersuisooqatigiit nutaat ima akeqarput

Naalakkersuisoq: Amigartoorutissart missingersuutinut naleqqiullugit amerlanngillat

Aningaasaqarnermullu naalakkersuisoq Aqqaluaq B. Egede Inatsisartunut akissuteqaatimini ima allappoq:

- Ukiuni sisamani aningaasanut inatsisiliornermi agguaqatigiissillugu ukiumut 40 millionit koruuninik amigartoortoqarnissaa missingersuutigineqarpoq. Tamanna ukiumut 6,5 milliardit koruuninik annertussuseqartumik aningaasanut inatsimmi missingersuusiornermut sanilliullugu qiviarneqassaaq, Aqqaluaq B. Egede allappoq nangillunilu:

- Naalakkersuisulli matumunnga peqatigitillugu 2017-imi sinneqartoorfiusumik missingersuusiornertik erseqqissaatigaat. Tamatumalu saniatigut Namminersorlutik Oqartussat massakkut piffissami qaninnermi 1,2 milliardit koruunit missaannik aningaasanik tigoriaannarnik pissamaateqarput, taamaalillunilu Nunatta karsiata tigoriaannarnik aningaasaqarnera aarlerinartoqanngilaq, Aqqaluaq B. Egede taama allappoq.

Aamma atuaruk Naalakkersuisoqatigiit nutaat 145 millionit koruuninik amigartooruteqarnissaq siunnerfigigaat

Aningaasanut inatsit Siumumit, Inuit Ataqatigiinnit, Partii Naleqqamit partiimillu illuatungiliuttumit Atassummit isumaqatigiissutigineqarpoq Demokraatinit taperserneqarani.