Aningaasaqarnermik suliaqartoq nalunaarusiami nutaami: Suliffeqarfinnut ikiorsiissutit atorunnaariartuaarlik
Corona qaammatialunni ajornartorsiortitsivoq, pisortaniillu ikiorsiissutit suliffeqarfiit akiliisinnaajunnaarnissaannut soraarsitsiortunnginnissaannullu piffissap ilarujussuani illersuipput.
Ikiorsiissutilli piaarnerpaamik atorunnaariartortinnissaannut piffissanngorpoq.
Aningaasaqarnermut Siunnersuisooqatigiit nunatta aningaasaqarnera pillugu nalunaarusiaminni nutaami tamanna ilaatigut siunnersuutigaat.
- Ikiorsiissutit ajornartorsiummut aaqqiissutissanngutinnerat eqqorluinnartuuvoq. Suliffeqarfiit aningaasarsiaqartullu ajornakusoortitsisimapput. Maanna susassaqarfippassuarnik ammaajartornermi immikkoortumi siullermiippugut, taamaammat ikiorsiissutit atorneqarfissartik naammassivaat, Aningaasaqarnermut Siunnersuisooqatigiit siulittaasuat, Torben M. Andersen KNR-imut oqarpoq.
AAMMA ATUARUK Coronap ajornartorsiortitsinerani: Aatsitassarsiortunut aningaasaqarnikkut piumasaqaatit naalakkersuiusut qasukkaraat
Taassuma ikiorsiissutit aningaasaqarnermut ’allanngutsaaliissutissatut’ nassuiarpai.
Piffissami ajornartorsiorfiusumi tamanna pingaarpoq, aningaasaqarnerli pitsanngoriartussappat naaleqqussartuarnissaq pingaaruteqarpoq. Suliffeqarfiit piumaneqartunut naleqqussassapput, unammillissapput qanorlu isaatitsisinnaanerminnut nutaanik iliuusissarsiussallutik. Qaammatit tamaasa aningaasatigut ikiorserneqarnissaq qulakkeeqqappat taama iliortukinnerussaaq.
- Ikiorsiissutit aningaasarsiornerup aallartilluarinissaanik ukkatarinninngillat. Taamaammat politikerit aningaasaqarnermut aallarnisaaqqinnissamut maanna pilersaarusiortariaqarput, Torben M. Andersen oqarpoq.
Takornariaqarneq uninngasoq
Suliffeqarfiit aalajangersimasut ikiorserneqarnissamik suli pisariaqartippaat.
Takornariaqarnermik suliaqartut coronap ajornartorsiortitsineranik ajornartoortinneqangaarsiarput. Takornariaqarnermut tunngasut tamarmik eqqugaaqqapput, Torben M. Andersenillu oqarnera naapertorlugu inuit nunatsinnut takornariarsinnaatinnagit takornariaqarnermik suliaqartut tamarmik sunnigaaqqapput.
2020-mi apriliimi unnuisut 2019-imi apriilimi amerlassuserisimasaannut sanilliullugit 90 procentit missaaannik ikinnerusut kisitsisaatigineqarallartunit ilaatigut takutinneqarpoq.
Takornarialerinermik suliaqartut unammillernartoqangaatsiartoq aamma nalunaarutigaat. Assersuutigalugu timmisartuutileqatigiiffiup Air Greenlandip atorfeqartut 60-it soraarsittariaqarpai.
- Takornarialerisunut amerlasuunut tamanna aarlerinartorujussuuvoq. Piffissap sivikitsup ingerlanerani unnuisussaarupput. Taava kalaallit Nunaanni sulinngiffeqartoqassaaq, tamannalu akunnittarfinni neriniartarfinnilu pisoqarfiulaassaaq, kisianni tamanna ajornartorsiortoqalinnginneranit annikinnerussaaq, Torben M. Andersen oqarpoq.
Suliffeqarfiit takornarialerisut tigummiinnarniaraanni ikiorsiissutit sivitsorneqartariaqarput. Taamaammanngippammi takornarialerineq tamarmi piffissami sivisuumi ajornartorsiussaaq, immikkut ilisimasalik oqarpoq.
