Coronap ajornartorsiortitsinerani: Aatsitassarsiortunut aningaasaqarnikkut piumasaqaatit naalakkersuiusut qasukkaraat
Naalakkersuisut Coronap ajornartoortitsinerani aatsitassarsiortitseqatigiiffinnut piumasaqaatit aalajangersimasut pingasut qasukkarpaat.
Inuussutissarsiornermut aatsitassanullu ataatsimiititaliap aatsitassanut naalakkersuisoq Vittus Qujaukitsoq (NQ) siunersiuinermut aggersagaagami taama saqqummiivoq. Ikiorsiissutit taakkua pingasut inuussutissarsiortut maattuut ikiorserneqassasut, Qujaukitsoq siunersiuinermi oqarpoq.
- Taama iliornikkut nunatsinni aatsitassanik ujarlernissamut piiaanissamullu soqutiginninnerujusuup aalajangiusimaneqarnissaa taavalu Kalaallit Nunaata aatsitassarsiortunut ajornartorsiorfimmi ikiuutilaarsinnaanera avammut ersersinneqartoq naatsorsuutigineqarpoq , aatitassanut naalakkersuisoq oqarpoq.
Misissueqqissaartussat piumaffigineqassanngitsut
Aatsitassarsiorfiit 2020-mi misissuinissaminni aningaasaateqarnissaanut piumasaqaat tunuartikkallassallugu Naalakkersuisut apriilip aallartinnerani aalajangersimasut ammasumik siunersiuinermi erserpoq.
Tassami aatsitassarsiorlutik misissueqqissaartussat misissuinermi misissukkap qanoq annertutiginera misissuinerullu qanoq sivisutiginera apeqqutaalluni ikinnerpaamik aningaasartuuteqarnissaat piumasaqaataagaluarpoq.
AAMMA ATUARUK Qujaukitsoq siunersiugaalersoq: IA Demokraatillu aatsitassalerineq pillugu ersarissaavigineqaqqupput
Aatsitassannut naalakkersuisup ikiorsiissutinik qinnuteqartoqarsinnaalernera saqqummiummagu aatsitassarsiortunut piumasaqaatit sakkukillineqarnissaannut peeriarfissat misissorini nalunaarutigaa, maannali piumasaqaatip ukioq manna peerneqarneranik inerneqarpoq.
- Suliffeqarfiit angallannerup killilersorneqarnera peqqutigalugu 2020-imi aasakkut suliassatut pilersaarutigeriikkamik naammassinissaat ajornakusoortissagaat ilimanarpoq, Vittus Qujaukitsoq nassuiaavoq.
Aningaasanut inatsimmut 20 millionit koruunit piumasarineqassasut
Qasukkartiterinerilli tamaannga killeqanngillat. Naalakkersuisut aatsitassarsiortut marlutsigut aamma ikiorserniarlugit apriilip 30-ani aalajangerput.
Naalakkersuisut oqartussat assigiinngitsut aatsitassarsiornissamut suliniutinik suliaqarneranni qaammatit pingasukkaarlugit akileeqqusisarput, kisianni akiliutissat taamaattut tamaasa 2021-mi ukiamut kinguartinniarlugit Aatsitassanut Naalakkersuisoqarfik aalajangersimavoq.
Tamaanna Vittus Qujaukitsoq nunatta karsianiit 20 millionit koruuninik qaavatigut aningaasaqarnermut akileraartarnermullu ataatsimiititaliamut piumasaqarnissamik kinguneqarpoq.
Nalakkersuisunit aatsitassarsiortunut ikiuutissat kingulliit aatsitassarsiortunut 25 millionit koruuninik aningaasassaqalersitsipput.
Tamanna aatsitassarsiortut ilaasa aatsitassanik piaareernermi avatangiisit iluarseqqinnissaannut atugassatut pinngitsooratik aningaasanik illuartisimasaasa affannik tigusisinnaalersinnerisigut pissaaq.
Katillugit 25 millionit koruunit suliffeqarfiit tallimat tigusinnaanngussavaat, taakkuli ukiut marluk iluanni uterteqqinneqassapput.
De fem selskaber, som har fået halvdelen af deres depositum tilbage.
London Mining aamma Nalunaq A/S aatsitassanik piaareernermi avatangiisit iluarseqqinnissaannut atugassatut pinngitsooratik aningaasanik aamma illuartitaqarput, taakkuali suliniutinut aalajangersimasunut pituttoqareermata utertiffigineqarnavianngillat.
