Qujaukitsoq siunersiugaalersoq: IA Demokraatillu aatsitassalerineq pillugu ersarissaavigineqaqqupput
Inuussutissarsiornermut Aatsitassanullu Ataatsimiititaliap Aningaasaqarnermut aatsitassanullu naalakkersuisoq ammasumik siunersiuinermut ullumi nalunaaqutaq ataatsimut aggersarpaa.
Tassani aatsitassarsiornermut Nalakkersuisut sunik iliuuseqarnersut pillugit siunersiorneqassaaq apeqqarissaarfigineqassallunilu.
Aatsitassarsiornermi aamma aatsitassat ulorianartunik qinngulanilinnik akulinnik aatsitassarsiorneq innuttaasut akerleriiffigeqigaat, Múte Bourup Egedep KNR-imit apersorneqarnermini oqarpoq.
AAMMA ATUARUK Savaatillit suliniaqatigiiffillu Kuannersuarni aatsitassarsiortoqalersaarnera ernummatigigaat
Taassumalu oqarnera naapertorlugu saffiugassat qaqutigoortunik piiaanissamik suliniut pillugu suliat Naalakkersuisut suliarilertorniaraat.
- Tusagassiorfitsigut tusartaqattaarpagut, taamaammat inatsisartut ilisimasariaqalerpaat susoqarpa? Innuttaasut ilisimasariaqalerpaat susoqarpa?
Innuttaasut toqqissisimasumik ingerlatissagunikkut sunaana aallaavigalugu naalakkersuisut massakkut iliuuseqalersut.
Inuussutissarsiornermut aatsitassanulu aataatsimiititaliami ilaasortaq Inuit Ataqatigiinneersoq, Mute B. Egede, taama oqarpoq.
USA-mik suleqateqarnissamut isumaqatigiissut aamma ammanerusumik suliarineqarsimasariaqaraluartoq, IA isumaqarpoq.
- Amerikamiut nunatsinni aatsitassarsiornermut pulajartuaarnissamut imaluunniit ilisimasaqarnerulernissamik suliaqartinneqarnerat paasisariaqarparput, qanoruna ataqatigiittoqartoq? Innuttaasut inatsisartullu ilisimasariaqalerpaat susoqarnersoq. Matoqqasumik ingerlaaseq ilumut taamaattuaannassanersoq naalakkersuisooqatigiit apeqqut taanna akisariaqalerpaat.
AAMMA ATUARUK Kina saffiugassanik qaqutigoortunik Kuannersuarneersunik pisiortorusuttoq
Ataasimiititaliami ilaasortaq demokraatineersoq Steen Lynge tassunga ilaliivoq:
- Kalaallit Nunaanik suleqatiginnikkusupput.Tamannalu aatsitassarsiornermik ilaatigut apeqqut sammimmat soorunami soqutigineqarpoq. Qanoruna taanna suleqatigiinneq imaqarniartoq?
Ullup qeqqata kingorna ammasumik siunersiuinissaq nunatta oqaluttuarisaanerani aappassaaneernerussaaq. Kikkut tamarmik najuuffigisinnaasaannik siunersiuineq ingerlanneqartartussaagaluarpoq, coronali ajornartoortitsimmat tusagassiortut kisimik immikkut najuussinnassapput.