Randi Vestergaard Evaldsen: Meeqqat akiligassat akilerneqartarnissaannik ilinniartinneqassapput
Innuttaasut milliardingajammik pisortanut akiitsoqarnerat paasinarsimmat Demokraatit siulittaasuat taama qisuariarpoq.
- Aningaasanut tunngasut, soorlu qanoq aqutseriaaseqartoqartarnersoq qanorlu missingersuisoqartarnersoq ajoraluartumik angerlarsimaffini perorsaanermiissimanngilaq , Demokraatit siulittaasuat Randi Vestergaard Evaldsen oqarpoq.
Missingersuutit aningaasaqarnerullu aqunnissaat sioqqutsisumik ilinniartitsissutigineqartarnerisigut tamanna kinguaariit tulliinnguuttussanut akisussaassuseqarnerulersitsisoqarsinnaasoq, Randi Vestergaard Evaldsen isumaqarpoq.
Meeqqat suli ukiukitsillugit aningaasaqarnermik ilinniartinneqarunik inersimasunngorunik aningaasanik aqutsillualersinnaassasut Randi Vestergaard oqarpoq.
AAMMA ATUARUK Akiitsoqaleraluttuinnarneq Randip ernummatigaa
- Atuarfimmi decimalit aggornilersuinerillu kisiisa pinnagit angerlarsimaffimmi aningaasaateqarneq, akiligassanut akileraartarnermullu tunngasut meeqqat atuarfiinut eqqunneqartariaqarput, partiip siulittaasua oqarpoq.
Nunatsinni innuttaasut pisortanut akiitsui milliardingajaapput, meeqqanut akilersuutit akilerneqatannginnerat akiitsut pingajorarterutigaat.
Meeqqat suli ukiukinneranni aningaasaqarnermut ilinniartinneqartalertuuppata innuttaasunullu akiitsulinnut akiliisitseriaatsimik pilersitsisoqartuuppat akiligassarpassuit ikiliartorsinnaagaluartut Demokraatit isumaqarput.
Demokraatit siulittaasuata aningaasaqarnermut naalakkersuisuunermi nalaani akiliisitsisalernissamut aaqqissuussamik sulissuteqaraluarpoq.
Maannali aningaasaqarnermut naalakkersuisup Aqqaluaq B. Egedep akiliisitseriaatsimik pilersitsisoqarnissaa qinersisoqareerput aatsaat aaqqiisoqarsinnaannerarpaa.
AAMMA ATUARUK Pisortanut akiitsut amerliartuinnarput
