Aningaasaqarnemut Siunnersuisoqatigiit siulittaasuat, Torben M. Andersen.Assi: KNR / Mads Malik Fuglsang Holm

Aningaasaqarnemut Siunnersuisoqatigiit: Meeqqat atuarfii pitsanngorsarsigit

Nuna inuillu aningaasaateqarnerulissappata meeqqat atuarfii pingaarnerpaatillugit pitsanngorsartariaqartut, siunnersuisoqatigiit oqarput.

Aningaasaqarnermut Siunnersuisoqatigiit, nuna inuillu aningaasaateqarnerulissappata, arlalinnik aaqqissuusseqqittoqartariaqartoq, ukiumoortumik nalunaarusiamik, sisamanngormat saqqummiussigamik oqarput.

Nunatta aningaasaatai killeqarput, pisariaqartitallu amerlallutik.

Taamaammat pingaarnersiuinissaq aaqqissuusseqqinnissarlu pisariaqartut, siunnersuisoqatigiit oqarput.

AAMMA ATUARUK Nunarsuarmi ajornartoortoqaraluartoq nunarput suli siuariartorpoq

Aaqqissuuteqqitassanili meeqqat atuarfiat nukiginnarnerpaasoq, taakkua naliliipput.

- Oqarta qinikkat meeqqat atuarfiannut pitsanngorsaatinik eqqortunik iliuuseqartut taava suli ukiorpassuit ingerlaqqaassapput meeqqat ilinniartitaanermi naammassisaqarnissaannut. Taamaattumik meeqqat atuarfiata pitsanngorsarnissaa pingaarnersaavoq, siunnersuisoqatigiit siulittaasuat, Torben M. Andersen oqarpoq.

Naqitatigut assigiittut piviusumiunngitsorli

Meeqqat atuarfianni nuna tamakkerlugu ilinniarnissamut periarfissat pappialatigut assigiikkaluarlutik piviusumi assigiinngitsut, taakkua uparuaapput.

Meeqqat illoqarfinni anginerusuniittut inukinnerusuniittunit, soorlu nunaqarfinniillutilluunniit isorliunerusuniittunit pitsasumik atuarnissamut periarfissagissarnerusut, siunnersuisoqatigiit tikkuaapput. Taamaanneralu inuunerup sinneranut sunniuteqartartoq, taakkua naliliipput.

Siulittaasoq: Suliffeqarnissamut pingaaruteqarpoq

Atuarfiilli ilinniarfiillu tunniussinnaasaat assigiissarneqarlutillu pitsanngorsarneqarpata, assigiinnginneq annikillineqarsinnaavoq. Tamanna naggataani nunamut inunnullu ataasiakkaanut iluaqutaassaaq.

Meeqqallu atuarnikkut assigiinerusumik periarfissaqarpata, tamanna inuiaqatigiinnut pitsaaasumik sunniuteqassasoq, aningaasaqarnemut siunnersuisoqatigiit oqarput.

- Suliffeqarnissamut periarfissaannut pingaaruteqassaaq, isertitaannullu. Kisianni aamma inuiaqatigiinnut pingaaruteqassaaq taamaaliornikkummi sulisut amerlanerulissapput, inuussutissarsiornikkut tunngavissagissaarnerusoqassaaq tamannalu nunap kommunillu karsiinut iluaqutaassaq, Torben M. Andersen oqarpoq.

Siunnersuisoqatigiit Naalakkersuisunut siunnersuisartuullutillu taakkunannga sulisinneqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl